TUMWÖY 115 - PIPÏLIA

¹ Ewo, machanye, we ECHOTYON machanye, wölo kaynengu nyo kitöni ororyö, akwompö chomnyengu nyo möwöghökonye.

² Pö ne kïtep pipö punton lö, “Mi onö tororötïngwa?”

³ Mi Tororötïncha yïm, kwighöy kïgh anka tïkwïl nyo mököy.

⁴ Kikigha tororötinekwa silpa nko koltin. Kitang ewuno ptangengmöt.

⁵ Tïngeto kutïw, amöngölonöcha tïng konyïn, amösïwïyicha.

⁶ Tïngeto yitïn, mölïmöcha tïng sörun, amönguchinicha kïgh.

⁷ Tïngeto ewun, amötötöpöcha kïgh tïng kelyön, amöpestocha. Memuköcha tökïngalan nyonikïny.

⁸ Chane cho kitang kïkarkegh nko tïkuchoni kigh lenye nyoni tïkwïl cho twoytoy kegh tïkuchoni.

⁹ Amantena kegh ECHOTYON, akwa pipö Israel. Ngörokokwa nyinte akughupokwa.

¹⁰ Amantena kegh ECHOTYON, akwa yiyo Aron. Ngörokokwa nyinte akughupokwa.

¹¹ Amantena kegh ECHOTYON akwa cho owöghöy nyinte. Ngörokokwa nyinte akughupokwa.

¹² Yongecha ECHOTYON akusoyönecha, soyönöy nyinte kö pö Israel ay soyönöy yiyo Aron.

¹³ Soyönöy pich cho wöghöy ECHOTYON, cho echön nko cho mïnkech.

¹⁴ Nya kïkonok ECHOTYON kwa nyo pöro, akwa nko monekwa.

¹⁵ Nya kusoyönokwa ECHOTYON, nyo kigh yïm nko ngwïny!

¹⁶ Pö ECHOTYON yïmwöy, wölo kitö ngwïny ptangengmöt.

¹⁷ Mösölönye pich cho kikuwonyö ECHOTYON, anta chane cho mi nyïngwïny.

¹⁸ Wölo kïsölecha cho kïchï sötote ECHOTYON, kïngata ye nko könyisyok kokay. Asala ECHOTYON!