TUMWÖY 112 - PIPÏLIA

¹ Asala ECHOTYON! Soyönote chi nyo konyïtöy ECHOTYON, kïngörokyini kirurutkachi lasiny.

² Lïku yiyenyi nyökon ompö kor kisoyönöy pïnpa pich cho tenote.

³ Lïku piko konyi sïkön nko monkor akïtöpo mantanyi lenyoni kokay.

⁴ Löpochini pich cho tenote ompö tuwïn le kitömöwon, tïng ECHOTYON kisyonöt nko pöropchö nko man.

⁵ Soyönote chi nyo karam mu nyo pösöntoy tïkuchi, nyo igho ngalechi man.

⁶ Mökïrïntonye chi nyo tenate, kinonöy nyinte kokay.

⁷ Mewöghönye atolïm ngal cho ghach, chïchïmate mïkulöwunyi kukönöy ECHOTYON.

⁸ Melö potpotönöy amewöghisïyinye, tökïtenö kïsïwa lö karïnta pungkachi.

⁹ Korkoröy ewunyi kïpögho tïkuchi mey, töpo mantanyi lenyoni kokay, kïsyolo owesyenyi konyït kokay.

¹⁰ Nyini kasïwa mwokïyon kïnarek, sïröy morïn ompö kilïl akupot sïrmoy, wonyot machatenyi kokay.