TUMWÖY 111 - PIPÏLIA

¹ Asala ECHOTYON! Oyokyinan sörö ECHOTYON ompö mïkulöwunyu kïmïkul, ompö ghömïcho pich cho tenote nko tuyeto pikachi.

² Echönöch tya ighisyewut pö ECHOTYON! Yöröy chi löwïr kunkïtu nyo ngörokini.

³ Nyïghitate ighisyewutkachi ororyö nko konyït akïtöpo mantanyi lenyini kokay.

⁴ Ighöy ighisyewutkachi cho pö töngönchin kenan, karam ECHOTYON akïtïng kisyonöt.

⁵ Töni omisyö pich cho könyïtöy nyinte amöwutyeghonye mumenyi nyonikïny.

⁶ Kikuporchï pikachi owesyenyi, otini kitö chane koroswo punton.

⁷ Ghanate akï pö man kïgh anka tïkwïl nyo ighöy, chïchïmote kirurutkachi löwïr

⁸ akï pö kokay nko kokay akikïkonï ompö man nko kitenat.

⁹ Kityak pikachi akwam muma* nko chane nyo möwïrönye, Tïlil nyinte akïtïng ris.

¹⁰ Kekonyït ECHOTYON kï towunöto ngöghomnyö. Tïngeto pköchin nyo karam pich cho rïpöy kirurutkachi. Töpo, salata nyo kïsölöy nyinte nko köny.