TUMWÖY 107 - PIPÏLIA

¹ “Oyokyinö ECHOTYON sörö, ompöwölo karam nyinte, möwöghökonye chomnyenyi kokay!”

² Nya kïmwa lenyoni pich cho kisörï ECHOTYON, chane cho kisörunö nyinte nyarïl

³ akïghamïtï kïpkana koros, kïpkana kongasis akïpkana ta akïpkana ewu löt akïpkana ewu tagh.

⁴ Kitompöroryö walaka ompö surkwen nyo tïryal amönyorïcha kanasyan nyo möngöy.

⁵ Kyam chane kömöy nko maral, akïmeghö.

⁶ Kilokyï nyu ECHOTYON ompö nyarïltangwa kïsörï nyinte chane ompö kiwongunötengwa.

⁷ Kuntöghoghchï chane kïpa or nyo tenate, ntökïtenö kwitïta kanasyan nyo möngöy.

⁸ Nya kuyokyï chane sörö ECHOTYON ompö chomnyenyi nyo möwöghökonye, nko ompö ighisyewutkachi cho kïtöngönchini cho ighchini ptangengmöt.

⁹ Ompöwölo nuköy cho amate maral akïpa cho amate kömöy kïpïghyö.

¹⁰ Kimang walaka wölo tuw lö yuk, ratan ompö nyarïl nko sïrïmtin,

¹¹ ompöwölo kipeny ngala Tororöt akïsas kirurötyo nyinte nyo Töror Tya.

¹² Kitunga mïkuliskökwa ighisyö nyo aghïgh, kipïtyini ngwïny akï puryö chi nyo kingwïn kungarak.

¹³ Kïlokyï chane ECHOTYON ompö nyarïltangwa, kïsörunö kiwongunötengwa.

¹⁴ Kïngwïsuna chane tuwïn nko wölo sïngir akungötiy sïrïmtinekwa kïmïtïkisyö.

¹⁵ Nya kuyokyï chane sörö ECHOTYON ompö chomnyenyi nyo möwöghökonye, nko ompö ighisyewutkachi cho kïtöngönchini cho ighchini ptangengmöt.

¹⁶ Rïngöy nyinte tekech pö karïn kïyotisyö akumïregh miröwonto karïn kïlïkwï odeny.

¹⁷ Kilïkwï sölwöy walaka, tökwipchï ngokikwa chane kösotyö.

¹⁸ Kitagh mutïnekwa omisyö anka tïkwïl ntökurumtö kukoti meghat.

¹⁹ Atolapay kïlokyï chane ECHOTYON otini kimi nyarïl, akïsörï nyu chane ompö kiwongunötengwa.

²⁰ Kusopö chane ngölyontenyi akïsörunö chane kiwonyogh.

²¹ Nya kuyokyï chane sörö ECHOTYON ompö chomnyenyi nyo möwöghökonye, nko ompö ighisyewutkachi cho kïtöngönchini cho ighchini ptangengmöt.

²² Nya kutö nyinte amörostin cho kitötegho sörö akïmwatïta ighisyewutkachi ompö tumwöyi ngörekyö.

²³ Pegho walaka melin ompö nanam, akwigha mïnchïrïsnön nanam.

²⁴ Kïsïwa chane ighisyewut pö ECHOTYON, ighisyewut cho pö töngönchin cho kigha nanam.

²⁵ Ompöwölo nyini kingalan, kïnget pich nyo awes nyo kisyol pögh ompö nanam.

²⁶ Kimpoltoy kïpa yïm akïröytö to, kïmeghö nyu mutïnö ompö nyörilwokchoni.

²⁷ Kitomïghighyö akïkwongkwongisyö le tömösï akuwonyeghö chïreryö chane!

²⁸ Kïlokyï nyu ECHOTYON otini kimi nyarïl kïsörunö chane kiwongunötengwa.

²⁹ Kipkong chepkiriri pö pögh kïsï akwigh mirtino pögh kïwïsyö.

³⁰ Kïngörekyö otini kisïwa lö wïsyö pögh. Kuntöghoghchï ECHOTYON chane nyo karam ntökwitïta koronini kipetöy.

³¹ Nya kuyokyï chane sörö ECHOTYON ompö chomnyenyi nyo möwöghökonye, nko ompö ighisyewutkachi cho kïtöngönchini cho ighchini ptangengmöt.

³² Nya kïsala nyinte tuyotïno pich akïsala nyinte kokwo poy.

³³ Kigh ECHOTYON lalwatïn kïyomö akwigh kori pöghon kïlïkwï terïtyon.

³⁴ Kigh nyïngwïtyan nyo akwagh kïlïkwï koro partin, akwompö ghöyityo pich cho kimöngöy wöloni.

³⁵ Kigh nyinte surkwen ngörpilwo pögh akwigh wölo tïyame kïlïkwï kori pöghon.

³⁶ Kiwuchï wöloni pich cho omöy kömöy, akïtek kanasyan nyo möngöy.

³⁷ Kïngor paren akïkatkat keti sapipun akïpït akwa cho chang.

³⁸ Kusoyön ECHOTYON pikachi akutö kïsïch monïng cho chang akïtas kyakikwa kïchangit.

³⁹ Otini kingörïngit akereny, ompö pïrö nko kichopöto kong nko kiwongunöt,

⁴⁰ kïsas ECHOTYON kichopichoni, akulïwö chane achakopi ompö siriron wölo puryö ara or.

⁴¹ Wölo kisörunö chopot nyarïltangwa akwigh kestoni pich kïtösisyö le kyak.

⁴² Sïwïyi pipö man choni akïngörekyö, akïnömisyö mwokïyis löwïr kutïway.

⁴³ Teröy pich cho ngöghomöch ngalechï akunanata chane chomnyo ECHOTYON nyo möwöghökonye. Tum pö Daudi.