TUMWÖY 106 - PIPÏLIA

¹ Asala ECHOTYON! Oyokyinö ECHOTYON sörö ompöwölo karam nyinte, pö kokay chomnyenyi!

² Ekïngo nyo muköy kïmwowu ighisyewut pö ECHOTYON cho echön? Akï ngo nyo muköy kïsal nyinte kïmïchï?

³ Soyönote pich cho rïpöy kirurutkachi, akwighöy man osis löwïr.

⁴ Inanante, we ECHOTYON, otini isyonchinenyi piköku, aingarakante tïkwïl otini isörunenyi chane,

⁵ atasïwan perur nyo pö kïlanköku aturönchï ngörekyeto piköku, anyorï ororyö tïkwïl nko chane.

⁶ Kakighacha ngokï le papotïnecha, kakïlïkucha mwokïyis akeghachitï.

⁷ Melö kiyang papotïnecha ighisyewut pö Tororöt cho pö töngönchin otini kimi chane koro Misri. Kiwutyeghö lö kisyonchï nyinte chane ompö chomnyenyi nyo pö kïtenö, akïpeny ngala nyinte nyo Töror Tya ompö sörömu Nanam nyo Pïrir.

⁸ Wölo kïsörï chane kïrïp kegh nko kiyomisötenyi, atökuporï owesyenyi nyo wow.

⁹ Kingölonchï Nanam nyo Pïrir, kïteny. Kumït chane kwoghyö kuwer orinyi le kor nyo tïyame.

¹⁰ Kisörunö nyinte chane mori kireyikwa, akutyaka chane pungkökwa.

¹¹ Kulum pöghechay pö nanam pungkökwa, akuwany lömïs.

¹² Ompö atoni, kughan nyu pikachi ngalechi akïsal nyinte ompö tumwöy.

¹³ Wölo kïwutyeghö chane ighisyewutkachi panini amelö kitö kïter kirurötenyi.

¹⁴ Kinyïghï chane pïrchin nyo wow tya ompö surkwen akïtyam Tororöt ompö wölini.

¹⁵ Kutö nyu Tororöt kini kisom chane wölo kïtösï tïkwïl kwenungwa sömew nyo gha.

¹⁶ Kyomchï chane nyonyintön Musa ompö surkwen kïmi nko Aron mötworinto ECHOTYON nyo tïlil.

¹⁷ Kïyata ngwïnya akïnyïkwïda Datan, akïtïp Apiram nko rïpankachi,

¹⁸ kïrökyï ma rïpanko pïchoni, akïpel mwokïyis choni lömïs.

¹⁹ Kwigha chane koltin mogh nyo lata kirïk ompö Sinay, atolapay kïsagh moghoni kigha morikwa,

²⁰ kukera ororyo Tororöt körkeyïn pö tany nyo omöy sus.

²¹ Kiwutyeghö Tororöt nyo kisöru chane, ompö töngönchin cho kigha koro Misri.

²² Kigh töngönchin ompö koro Am! Akwigh tïkwïn cho pö otyogh ompö Nanam nyo Pïrir!

²³ Kïlenyona kïlö Tororöt opöröy chane, akimöngötunye ntömöghetisyö kïlanenyi Musa akïkar nyölotyo Tororöt tömewany chane.

²⁴ Atolapay kïsas pïchay koronay karam ompöwölo kimeghancha kiyomisöto Tororöt.

²⁵ Kïngwïrngwïroncheghö emenikwa amelö kitökïcham kïlïm kuti ECHOTYON.

²⁶ Kïlenyona, kïsyol Tororöt parak ewunyi, akuwalwal lö owongöy chane ompö wölini le surkwen,

²⁷ atoytoychï kwenu pipö punton, akïpïsyï chane kïyasta kïghömï ngwïny kïmïkul.

²⁸ Atolapay kïsagh Paal* ompö Peor akwam amörostin cho kikïpörchï oy.

²⁹ Kwigh chane ECHOTYON kïnarek ompö ighisyewutkökwa choni, kuchumchï chane sömewö nyo gha.

³⁰ Wölo nyinte kipar Pineas pich cho le lelï, kwigh Tororöt sömewonay kïwö lömïs.

³¹ Kilïkwï nyu kïyoni nyo kikinana nyinte lö kigh man, atökenonöy ompö pïnwöy löwïr kokay.

³² Kigh pïchoni Tororöt kïnarek ompö kö pö pögh nyo pö Meripa ntökususö kegh Musa chane.

³³ Kutö chane Musa ngwonïn nyo kigh nyinte kïsörchï ngal.

³⁴ Melö kipar pipö punton lenyini kökikïmwochï ECHOTYON chane.

³⁵ Wölo kighömö nko chane akunet kegh otöptinekwa.

³⁶ Kïsagh körkeyïntin, cho kïlïkwï ngöghöp ompö chane.

³⁷ Kutötö monekwa cho le wor nko tipïn, kepar kïlïkwï amörostino oy.

³⁸ Kïmïlta nyu kisön pö pich cho puryö lelut, kisönko monekwa cho le wor nko tipïn, kïpighchï körkeyïntino pipö Kanan akusïmnyonö kor kisön.

³⁹ Kisïmnyon kegh chane ompö ighisyewutkökwa akïlïkwï cho meghönote ompö Tororöt, le cheporestin.

⁴⁰ Kïlenyona kïnörekyï ECHOTYON pikachi, akunyïta tya nyinte ompö chane.

⁴¹ Kutö chane mori pipö punton, kïpayta pungkökwa chane.

⁴² Kinyaril pungkökwa chane kong akïpayta ompö kat.

⁴³ Kisörï Tororöt pïchoni kïnyïl cho chang, wölo kïkïl kïpeny kirurutkachi, kïtasa kïyetï tya ghöyityengwa.

⁴⁴ Wölo kïrkegh kïlenyoni, kiyang ECHOTYON rira chane otini kilïm kiwongunötengwa.

⁴⁵ Kunan muma* nyo kyam nko chane, kusyonchï chane kïrïp kegh nko chomnyenyi nyo wow nyo möwöghokonye.

⁴⁶ Kwigh pich löwïr cho kichopöy kong chane, kusyonchï chane.

⁴⁷ Sörwecha, we ECHOTYON Tororötïnyo, aighamïtwecha kemïlisyeghenö koroswo punton, atökeyokuchanyi sörö akekwol kaynatengu nyo tïlil!

⁴⁸ Asala ECHOTYON, Tororöt pö Israel! Asala nyinte ye nko kokay! Nya kïmwa chi anka tïkwïl lö, “Amen!”* Asala ECHOTYON!