TUMWÖY 105 - PIPÏLIA

¹ Oyokyinö ECHOTYON sörö, amwatïta wölo wow nyinte kïlïkwï, omwochinö pipö punton ngal cho kigh nyinte.

² Otumchinö ECHOTYON ompö salat, amwatïtena ngala töngönchin cho kigh nyinte.

³ Ongörekyenö ompöwölo ochikwa pikachi, akanya kïturonchö pich löwïr cho soghöy nyinte.

⁴ Opechinö wölo mi ECHOTYON tosïkö kingarakat, asagh nyinte kïtenö osis.

^5-6 Akwa pipö ara Apraam mötworintenyi, akwa pipö ara Yakopo nyo kikïl nyinte: anana ighisyewutkachi cho kigh cho echön.

⁷ ECHOTYON kï Tororötïncha. Mito kirwokutkachi ngwïny kïmïkul.

⁸ Ripöy nyinte mumenyi kokay akurosöy lö ketïta kïgh nyo kimwa ompö pïnwöy löwïr.

⁹ Ripöy mumenyi nyo kyam nko Apraam nko kiwalwalatenyi ompö Isak.

¹⁰ Kiyomis kegh ECHOTYON nko Yakopo akïmwa lö töpo kokay mumanoni.*

¹¹ Kimwa lö, “Okonokwa koro Kanan kïlïkwï nyinkwa nyo omïlöy.”

¹² Melö ki chang pïchoni pö Tororöt aki to chane ompö korononi pö Kanan.

¹³ Kitompöroryö chane ompö punton, kïngata paytaghnï ntökwit paytaghta anka.

¹⁴ Wölo melö kipïsyï Tororöt chane kepïr, kikarta chane akï chil pöytoghichoni lö,

¹⁵ “Mada kïgh mötworichan cho kyakïlan, maswany werkoyköchan.”

¹⁶ Kitö ECHOTYON kömöy korengwa akunyara chane omisyewut löwïr.

¹⁷ Akï kiyonta chi nyo kintöghoghchini chane, nyo kikuro Yosep, nyo kökikyalta kïlïkwï sekeyon.

¹⁸ Kikïrat kelyechi ompö sïrïmtin nko kösinko karïn nyo kiwit katïnyi,

¹⁹ ntökïtenö kwitïta ngölyon nyo kingor nyinte lö igho. Kuporï nyu ngölyonto ECHOTYON lö kipö man ngalechi.

²⁰ Kutyak nyu pöytoghinto Misri nyinte kikityak pöytoghinto pipö punton.

²¹ Kutö nyinte kughyongchï katanyi akutö kïpayta kore kïmïkul,

²² akintöghoghchini yetïntinechi le wölo kimöktoy. Kikunet poyichi ngöghomnyö.

²³ Atolapay kïrutö Israel koro Misri, kïmang Yakopo koro Am le pïnotyon.

²⁴ Kusoyön ECHOTYON pikachi kïnyorï monïng cho chang, akwigh kwowesöchitu kïtïl pungkökwa.

²⁵ Kwigh pipö Misri kurey pikachi, akwighchï mötworichi ngöghomnyö.

²⁶ Kïyonta nyu mötworintenyi Musa nko Aron nyo kikikïl.

²⁷ Kuparta töngönchin pö Tororöt cho echön ompö tawu pipö Misri akwigh töngönchin ompö koro Am.

²⁸ Kwigh Tororöt koronay kïtuwit wölo kïtagh pipö Misri kïrïp ngalechi.

²⁹ Kïwaghach lalwatïnekwa kïlïkwï kisön akïtïgh kaghaghekwa lömïs.

³⁰ Kulum mnyakaway korengwa, kulum ompö nyini le kö pö pöytoghin.

³¹ Kïyonï Tororöt kolyong nko sïr cho kilum korengwa kïmïkul.

³² Kiropönchï takarïs nyo kitöropönu pögh nko kiryal nyo kighömï korengwa kïmïkul.

³³ Kunyar sapipunekwa nko makanykakwa akïrïny ketikwa löwïr.

³⁴ Kingalan Tororöt, kupilu talam cho kimeyitisyocha.

³⁵ Kwam kïgh anka tïkwïl nyo kipita korononi, akwam akweko parenikwa lömïs.

³⁶ Kïpar poretay ompö Misri löwïr kuwany mïrön chini kapusï.

³⁷ Nyini kiwonyö, kuwuwö pipö Israel korononi, kïpa akwip ropïyenikwa nko koltinekwa, kinöryote chane löwïr.

³⁸ Kiwagh pipö Misri chane, kïlenyona kïngörekyö otini kipa pïchoni.

³⁹ Kighïtochï Tororöt pikachi polta nko ma nyo kitö chane löpoyïn ato le oghö.

⁴⁰ Kisomsyö chane, kutö alurïtin, akupïghyongö chane omisyo yïm.

⁴¹ Kikarer ghat, kïmïlï kegh pögh akuyinta ompö surkwen le lalwa.

⁴² Ompöwölo kinan ngölyontenyi nyo tïlil nyo kimwochï mötworintenyi Apraam.

⁴³ Kïlenyona kïwuwö pikachi korononi, kïtumotö chane akuteghyotö ompö ngörekyö.

⁴⁴ Kitö Tororöt chane koroswekwa pikö walaka akïpïsyï chane kïmïl parenikwa cho kisïnga,

⁴⁵ atömanyïl kïkaman pikachi kinetutkachi akïrïp kirurutkachi. Asala ECHOTYON!