TUMWÖY 103 - PIPÏLIA

¹ Sala ECHOTYON, söpontanyu wey! Kïgh anka tïkwïl ompö orinyan, kusa kaynenyi nyo tïlil!

² Sölöy söpontan ECHOTYON, amewutyeghö tïkwïn cho karamach cho kikwigh.

³ Löstoghwanïn ngokichu löwïr akusopöy sömewutköchan löwïr.

⁴ Sörwanïn achïwïta meghat akusoyönanïn ompö kisyonötenyi nko chomnyenyi nyo pö kokay.

⁵ Kenyïghit söpontönyan tïkwïn cho karamach. Ato töpan le chumwak nyo tïng owesyö nyo lata nyo pö sich.

⁶ ECHOTYON nyo rwokyini ompö man akutöni pich cho kireyöy mantangwa.

⁷ Kiporchï Musa tötutkachi akïpïsyï pipö Israel kïsïwa ighisyewutkachi cho echön.

⁸ Tïngeto ECHOTYON kisyonöt akï karam, mïkukönöy nyinte ompö chomnyenyi nyo pö kokay.

⁹ Melö syölöy kïnomnyö, anta syala nyo kogh

¹⁰ Melö ighwecha kïrïp kegh nko ngokicha amelö ghokecha kïrïp kegh nko ngokicha.

¹¹ Le wölo lowtö yïmö ompö ngwïny, kïlata nyoni chomnyenyi ompö pich cho konyïtöy kaynenyi.

¹² Le wölo low tya kongasis nko ta, lenyoni wölo wirtoy nyinte ngokicha kïlowöchitu nko acha.

¹³ Le wölo syonchini papo monechi, kusyonchini ECHOTYON pich cho konyïtöy kaynenyi.

¹⁴ Ompöwölo nkït porwoyicha wölo kikida, nkït lö kïchicha terïtyon.

¹⁵ Karkegh wölo töptoy ptangengmöt nko sus. Lata tapïka wuw,

¹⁶ nyo otini kakut yomat kïtïryalit otini kömito amelö tökesïwïyi ngat.

¹⁷ Wölo mi chomnyo ECHOTYON kokay nko pich cho wöghöy nyinte kïnomnyö akïmi köromnyenyi nko pïnwöy löwïr,

¹⁸ cho pö pich lapay cho ripöy mumenyi akïrïpöy kirurutkachi.

¹⁹ Ketö ECHOTYON ngacharu paytaghtanyi yïm akïpöytoy tïkwïn löwïr.

²⁰ Asala ECHOTYON malayken cho owesöch, akwa cho orïpöy kirurutkachi, akwa cho olïmöy kini mwoghöy nyinte!

²¹ Asala ECHOTYON söpïchisko lïkenyi löwïr, akwa mötworichi cho oghöy machatenyi!

²² Asala ECHOTYON tïkwïn löwïr cho kikigh cho omi woptin löwïr nyo pö paytaghtanyi Sala ECHOTYON, we söpontanyu!