TUMWÖY 101 - PIPÏLIA

¹ Otumunyi ye nyu, we ECHOTYON, tum nyo pö kighanat nko man.

² Otöponan ompö or nyo puryö lelut, ingwïnenyi oyï wöl omitan? Omöngan konyu ompö kitenat.

³ Amelö omïkukönchinan ghöyityö. Ghöchinanïn ighisyewut cho kichumpön. Melö tuyot ngalechoni nko chichan.

⁴ Olowitan kegh nko wökï amotïnganye kïgh ngokï.

⁵ Opöran chi nyo swomöy pöröryenyi sison amomïkukönchinanye pkatis nko menot.

⁶ Ochöman pich cho ghönote ompö kor, tökïtïpï chane nko ani. Pöghisyewanïn chi anka tïkwïl nyo puryö lelut.

⁷ Möminye putin nyo töpo wölo omöngan amelö otöponan nko lïsin.

⁸ Onyoran mwokïyis cho mi korencha osis löwïr, atömanyïl oyonan chane kanasyanta ECHOTYON. Saghata chi nyo mi nyarïl, otini kaghach akupït akïlïmchï ECHOTYON rirenyi kïmïkul.