TOWUNÖT 7 - PIPÏLIA

¹ Kïlenchï ECHOTYON Noa, “Lïtö meli nko pikökwo löwïr, ompöwölo kasïwan lö nyi onkït ompö ngwïny kïmïkul nyo ighöy nyo tenate.

² Ipö tyonkïn cho le mut nko odeny cho kyomöy nyo le kïrkït nko nyo sakate. Ipenyi tïkwïl tyonkïn odeny odeny cho melö kyomöy.

³ Ainam törit mut nko odeny, kïrkït nko korketö. Ighenyi lenyoni tömewonyeghö tyonkïn cho kikigh ngwïnyinï.

⁴ Ompöwölo köngötï osiswö cho le mut nko odeny ntökwitï ato oropönchinan ngwïny osis tömönut angwan, pöghet nko nangat, tökewur tïkwïn cho söpsot cho mi ngwïny cho kyaghan.”

⁵ Kwigh Noa kïgh anka tïkwïl lenyini kimwochï ECHOTYON.

⁶ Kitïng Noa könyis 600 atoni kilum puseryonta ngwïny.

⁷ Kïwö nyinte kïlït meli nko korkenyi nko werkachi nko korukwa tökïchïwïtyeghö puseryontonay.

⁸ Kichïwït nyinte nko tyonkïn lapay cho kyomöy nko tïkwïl cho kimelö kyomöy nko törit nko tyonkïn kïsyach cho echön nko cho mïnkech, odeny odeny. Kïrkït nko nyo sakate

⁹ kïlïtöy chane melinay kïle nyini kimwochï Tororöt nyinte.

¹⁰ Nyini kewonyö osiswö cho le mut nko odeny, kwitï puseryontonay.

¹¹ Otini kitïta Noa könyis 600, asisto 17 nyo pö araweto odeny, kïyotisyö asisoni konyi pöghon cho kimi ngwïny, kutulï pögh ompö owesyö akïyotisyö kukoti pögh cho mi yïm.

¹² Kïropan akïropan ompö osis tömönut angwan pöghet nko nangat.

¹³ Kïlït Noa melinay nko korkenyi nko werkachi, Syem nko Am nko Yapet nko korukwa asisoni kitor kïropan.

¹⁴ Kipa chane nko tyonkïn löwïr, kyak nko cho pö wudïn, cho echön nko cho mïnkech nko tarit anka tïkwïl.

¹⁵ Kïrkït nko nyo sakate nyo pö kïgh anka tïkwïl nyo satate: kïpa kïlïtöy melinay nko Noa,

¹⁶ lenyini kimwa Tororöt. Atolapay kïkar ECHOTYON kukat.

¹⁷ Kulum puseryonta ngwïny osis tömönut angwan. Otini kitösisyö pögh, kïsyol meli parak.

¹⁸ Kïkany kïtösisyö pögh tya ompö ngwïny kïwesteghö meli paraku pögh.

¹⁹ Kïtösisyö pögh akïtösisyö ompö owesyö nyoman ntökulum kutïngkot cho kikoghöch tya cho kimi ngwïny.

²⁰ Kïtösisyö pöghechay ntökulum kutïngkot akïtas miten mut nko odeny parak.

²¹ Kïmeghö tïkwïn tïkwïl cho sötote cho kimi ngwïny: törit nko kyak nko tïpö wudïn nko walaka tïkwïl cho chuto kegh mu ngwïny nko pich löwïr.

²² Kïma kïgh anka tïkwïl nyo tïng kimïny ompö ngwïny.

²³ Kuwur ECHOTYON tïkwïn tïkwïl cho söpsot cho mi ngwïny: pich nko tyonkïn löwïr nko törit tïkwïl. Kikiwany tïkwïn löwïr kïpoto Noa onkït nko chini kimi nko nyinte meli ori.

²⁴ Kïtïpï pöghechay ngwïny osis 150.