TOWUNÖT 49 - PIPÏLIA

¹ Atolapay kïkur Yakopo werkachi akïlenchï, “Aghamïta kegh tomwowok kïgh nyo igho osis cho pkonöy ompö akwa.

² “Aghamïta kegh nyu werpö Yakopo, ater ngaleko papongwo Israel.

³ “Nyi Rupen, ichinyi poretyenyan aichï owesyenyan, nyo kiyat yiyenyan. Nyo ikwolenyi kegh ompö konyït, aiwulöy kegh, aichï awes nyoman

⁴ Ilatenyi mirtino pögh ompö lalwa, nyo melö ichinyi kïgh. Ompöwölo kiwenyi chemïnïngwo* kon ailomsyö ipus pöröyeto kon.

⁵ “Tupchö Simion nko Lawi. Tïkukwa cho kïrïmo pich chokonï.

⁶ Osirenan kegh kokwotïnekwa, mochömanye otuyö nko chane. Ompöwölo kipar pich ompö nörekyengwa, akïtor eghin aghisay kwïle.

⁷ Chïpote nörekyengwa nyo kigha nyoman, ompöwölo kimötïngnye kisyonchin. Ochöghan chane ompö kö pö Yakopo. Atoytoyö chane ompö koro Israel.

⁸ Nyi Yuda, kusinyi werkökwa asïyech, itökenyi punköku. Kïtïngchininyi werkökwa.

⁹ “Ilatenyi wawa ngötïny we Yuda, kengwïnenyi wölo kepörchinyi kïgh. Werïnyu, keghïteghenyi ngwïny le ngötïny, ngo nyo muköy ntökunget nyinte?

¹⁰ Melö wegho lïpö paytagh Yuda. Pöytoy monechi kokay ntökïtenö kungwïn nyinte nyo mïchini kïpayta, akïkïtïngchini pipö punton nyinte.

¹¹ Rötyini sïkïryenyi ket pö sapipu, akïrötyï wawe ket pö sapipu nyo karam nyoman, akïmwata sïrokachi kumpa sapipun akïmwata anankis pögho sapipun cho pïröch.

¹² Pïröchitu konyichi ompö kumpa sapipun akïrelachitu kelechi ompö chö.

¹³ “Möngöy Saplon sörömu nanam, akïlïku kapkimïny pö melin kïlïkwï sörömunyi Sidon.

¹⁴ “Karkegh Isakar nko sïkïryö nyo körom, nyo rïwöy kwenu asachoy.

¹⁵ Wölo kisïwa lö karam wölo kimungo, akïsïwa lö pïchigh kore. Kïlenyona kungïrukö tökïkasan tïkwïn, akegh ompö kat kïlïkwï sekeyon.

¹⁶ “Rwokyini Dan pikachi, ompöwölo tökï ore anka nyo pö Israel.

¹⁷ Lïku Dan moroy nyo mi or, mïny nyo mi or kamas, nyo sïröy angole putïlöy, kïtarenta ipinte kïweghö ara patagh.

¹⁸ “Kyakanyan sörunötengu ECHOTYON.

¹⁹ “Riköy lïko chelölos Kad, wölo poryegho ntökïyon chane.

²⁰ “Okwoghöch omisyewut pö Asyer, akïkonu tïkwïn cho ngöröko pöytoghintö.

²¹ “Karkegh Naptali nko akwete nyo tyakate, nyo yiyöy wara cho pïchighöch.

²² “Karkegh Yosep nko ket nyo tökïngarngar, nyo pito atolekïtö kö pö pögh, nyo sïlöy akïlang morichi nayat.

²³ Kiporyeghö pung nyinte cho köromöch nyoman, kiwut akuchop kong nyinte.

²⁴ Wölo kingötï kwantinyi mökinateghanye, akinyoru owesyö ewunechi, ompö kingörokutyo ewuno Kimuktoghinto Israel, ompö kaynata Mösöwon Ghatya Israel.

²⁵ Ngörokinyi Tororöt pö papongu, Tororöt Kimuktoghin nyo soyöninyi ompö kisoyönut cho pö yïm nko kisoyönut cho pkono ngwïny nko kisoyönut pö kitïn nko yiyö.

²⁶ Owesöch kisoyönutko papongu kïtïl kisoyönut pö kutïngkot cho pö könyisyok nko tïkwïn cho pïchighöch cho pö yïm. Nya kïtïpï möt pö Yosep kisoyönutchoni, akïtïpï paraku nyinte nyo kikepesyeghö werkökwa.

²⁷ “Suyon Penchamen nyo mutmutöy, omöy tökwoghö cho könyorchï sakas. Akïchaghachagh nangat cho könyorï.”

²⁸ Chete löwïr kï ortïn taman nko odeny cho pö Israel akï chete cho kimwochï kwanta chane otini kisoyönisïyi. Kisoyön chi kïrïp kegh nko kisoyönut cho kimwochini nyinte.

Karapas Yakopo aketïp

²⁹ Kirur Yakopo chane kïlenchï, “Lekït arapasan aroranïn nko papotïnechan ompö köpönonay mito para Epron nyo le chi pö Ititi,

³⁰ ompö köpönononi mito para Makpela okumpö tagh ompö Mamre nyo mi koro Kanan nyo kyal Apraam nko nyay pö Epron, kyal lö tökïlïkwï wölo kïtïpchini pich.

³¹ Kikïtïpchï atoni Apraam nko kokönyontenyi Sara, aketïpchï atoni Isak nko kökönyontenyi Repeka atïpchan atoni Lea.

³² Kikyal pare nko köpöne nyo mi ori kyala pipö Ititi.”

³³ Otini kiwany Yakopo kurur monechi kuyoda kelyechi kughegh pöröy, kunuk akïma.