TOWUNÖT 26 - PIPÏLIA

¹ Kitï kömöyu anka korononi nyo kisis nko nyakinya kipö tagh, nyo kimi ompö osiswo Apraam. Kïwö Isak kutang Kerar wölo kimi Apimelek pöytoghinto pipö Pilisti.

² Kungwïnchï ECHOTYON Isak akïlenchï, “Mewö ngat iröytö Misri, wölo töpenönyi korononi opörunyi.

³ Ilïkunenyi ton ompö korononi, totöpan nko nyi asoyöninyi. Ompöwölo okoninyi tönön piko yiyengu koroswechete löwïr, achïchiman mumenyu nyo kyomwochan papongu Apraam.

⁴ Otösan piko yiyengu kïkarkegh nko kokelya yïm tönön chane koroswechete löwïr akeperuröy pipö punton tïkwïl ompö piko yiyengu,

⁵ ompöwölo kitechanïn Apraam akïrïp kiyomisutköchan nko kirurutköchan.”

⁶ Kïlenyona kïmang Isak wölnö le Kerar.

⁷ Nyini kitep piko wöloni ngaleko korkenyi, kïsöwintönchï nyinte lö ki cheptöngwa, ompöwölo kiwagh lö ato amwagh lö, ki korkenyi kitöptoy kipöröy pich nyinte tökwip Repeka, ompöwölo ki pïchigh Repeka.

⁸ Kikany kïtöpö wölini osis cho chang, kïtopönteghö tïrisya Apimelek nyo kile pöytoghinto pipö Pilisti, kïsïwa lö pirönöy Isak nko korkenyi Repeka.

⁹ Kïlenyona, kïkur Apimelek Isak akïlenchï, “Kichö korkengu nyete, kwompö ne temwaghanyi lö cheptönkwa?” Kuyokyï Isak lö, “Ompöwölo kyawaghan lö kïpöranïn ompö nyinte.”

¹⁰ Kïtep Apimelek lö, “Ne ngölyonte nyï keghwechanyi? Kemuköy chi akong ompö piköchan ntökïrï nko korkengu tökwipkecha ngokï.”

¹¹ Kïlenyona, kïrirchï Apimelek pich lapay lö, “Kïpöröy chi anka tïkwïl kïma nyo swongöy chichï anta korkenyi.”

¹² Kïkatkat Isak kösïgh korononi könyinoni, kwil kïnyïl pokol, ompöwölo kiperur ECHOTYON nyinte,

¹³ kïlïkwï chichay sïkön akïtas kïsïch tïku walaka nko walaka ntökïtenö kïlïkwï nyinte sïkön nyoman.

¹⁴ Kitïng okwotin cho pö kechir nko cho pö tïch nko cho le mötwor tïkwïl cho chang cho pö konyi: kïlenyona, kwipö kong pïchay pö Pilisti nyinte.

¹⁵ Kïtïpö nyïngwïny pïchay pö Pilisti koriko pögh löwïr cho kökikïpal mötworiko paponyi Apraam otini kitökïsöpöy nyinte.

¹⁶ Kïlenyona, kïlenchï Apimelek Isak, “Ngetena korencha ompöwölo ichinyi awes tya kïsirecha.”

¹⁷ Kïlenyona kïweghö Isak koronay akïpörtochï emenyi mpöghoghyo Kerar akïmang wöloni.

¹⁸ Kïpal ngat Isak korichay pö pögh chanya kikïpal atakinya kitökïsöpöy kwanta Apraam, kïtïp pipö Pilisti otini kirapas Apraam akïkurö kaynötutchay kökikutö paponyi.

¹⁹ Wölo otini kipal mötwori Isak mpöghoghyonay akïnyorchï kö pö pögh nyo kosu.

²⁰ Kïporyö mösöwo Kerar nko cho pö Isak, kimi kïlentöy, “Chicha pöghechï.” Kïlenyona kïkurö Isak köyoni pö pögh Esek, ompöwölo kiporyö chane nko nyinte.

²¹ Kïpal koto pögh anka kïporyeghö nyoni tïkwïl, kïkurö Isak Sitna.

²² Atolapay kïwuwö Isak wöloni akïwö kïpal koto pögh anka amelö kiporyeghö chi köyoni. Kïkurö Isak Reopot akïlö, “Ompöwölo keghwecha ye ECHOTYON pöroyïn, tökeyichinö koronete.”

²³ Kïweghö Isak wöloni ntökwit Persyepa

²⁴ Kungwïnchï ECHOTYON oghononi akïlenchï, “Ochan Tororöt pö papongu Apraam. Mewöghisyö ompöwölo omitan nko nyi, operurinyi, tösunyi piko yiyengu kïchangit ompö paraku mötworintenyan Apraam.”

²⁵ Kïlenyona, kïtek Isak wöloni ato kïpelo amöros akïsagh ECHOTYON ompö atoni. Akïtek emenyi, akïpal mötworichi kö pö pögh atoni.

Kam Isak muma nko Apimelek

²⁶ Kïweghö Apimelek Kerar kutang wölo mi Isak kïmi nko kongenyi Ausat nko Pikol nyo kile yetïn pö lïkenyi.

²⁷ Kïtep Isak chane lö, “Kopkonchanïkwa ompö ne akwanyï omikwa owöchanïn ayonenanïn atanya korengwo?”

²⁸ Kuyokyï pïchay lö, “Kakïsïwecha nyoman lö mi ECHOTYON nko nyi, kelecha karam kyamacha muma nko nyi, tökeyomisö kegh nko nyi,

²⁹ lö tömeghwecha kïgh nyo gha, kïle wölini melö kikidecha nyi kïgh, wölo kikïpïstecha kegh nko nyi ompö kalya. Akakesïwecha ye lö kakuperurinyi ECHOTYON.”

³⁰ Kïlenyona, kwighchï Isak chane omisyö nyo wow, kwomisyö pïchay akïgheghsyö.

³¹ Ato mi ato le asïyech, kïnget nyini le kiwasan akwomchï kegh muma. Atolapay kïpïstö Isak chane kïpa ompö kalya.

³² Ato mi asisoni, kïpka mötwori Isak akïmwochï nyinte ngala köyay pö pögh kimi chane kïpölöy lö, “Kakïnyorucha pögh!”

³³ Kïlenyona kïkurö Isak köyay pö pögh Sipa. Kïlenyona kekurö kanasyantanay Persyepa nko ompö nyete le ye.

Kip Esau kor cho pö sany

³⁴ Kip Esau kor odeny ato kitïngetö könyis 40 cho kipö pipö Ititi. Kip Yudit chepö Peeri nko Pasemat chepö Elon.

³⁵ Kigh koruchoni otöp nyo pö Isak nko Repeka kïngwanit.