TOWUNÖT 25 - PIPÏLIA

¹ Kip Apraam korketö anka nyo kïkuro Ketura.

² Kïyichï Simran nko Yoksyan nko Medan nko Midyan nko Ispak nko Syua.

³ Kïsïch Yoksyan Syepa nko Dedan, kï ki pipö Asyur nko Letus nko cho pö Leum.

⁴ Akï werpö Midyan kï ki: Epa nko Eper nko Anok nko Apida nko Eldaa. Ki monïngo Ketura choni lapay.

⁵ Kïpïsyï Apraam Isak tïkuchi tïkwïl,

⁶ wölo kutö ropöw werkö koruchi cho kile chemïnïngwen,* otini kitökïsöpöy akuwï chane kïpa wölnö le kongasis tökïlowöchitu nko werïnyi Isak.

Karapas Apraam aketïp

⁷ Kïtöpö Apraam ntökïyosit nyoman. Kitïng könyis 175.

⁸ Atolapay kïrapas.

⁹ Kïtïp nyinte werkachi Isak nko Ismael ompö köpöno Makpela nyo kile para Epron, wero Soar nyo kile chi pö Ititi nyo mi kongasispa Mamre,

¹⁰ paranay kyala Apraam pipö Ititi. Wölo kikïtïpchï Apraam nko korkenyi Sara.

¹¹ Akwotini kökirapas Apraam, kuperur Tororöt Isak werïnyi. Kimi Isak kïmöngöy atolekïtö Peer Laay Roy osiswechoni.

Monïngo Ismael

¹² Achï nyu ortïna Ismael wero Apraam nyo kiyichï Akar nyo kile chepö Misri, aki mötworinto Sara nyinte:

¹³ kitïng nyinte werkachi, achï kaynötutkökwa kïrïp kegh nko yiyengwa: montö nyo pö tagh kï Nepaiot, kïrïp Kedar nko Adpeel nko Mipsam nko

¹⁴ Misma nko Duma nko Masa

¹⁵ nko Adad nko Tema nko Yetur nko Napis nko Kedema.

¹⁶ Werchoni pö Ismael cho kile kukötino punton taman nko odeny: kikinkïtunö kaynötut pö kanastin nko wölo kikïmöngöy.

¹⁷ Kitïng Ismael könyis 137 otini kiröpösöy.

¹⁸ Kïmang piko yiyenyi kor nyo kimi kwenu Apila nko Syur nyo pörtoy kongasispa Misri ompö or nyo wetöy Asirya. Kipa kïmang wölo lowö piko yiyo Apraam walaka.

Yiyo Esau nko Yakopo

¹⁹ Achï lökoy cho pö wero Apraam nyo kile papoto Isak.

²⁰ Kitïng Isak könyis tömönut angwan otini kipöy Repeka, chepö Petuel nyo pö pipö Sirya ompö koro Mesopotamia, aki chepto ompö Lapan.

²¹ Ki sonö Repeka, kïlenyona kïsagh Isak ECHOTYON ompö nyinte. Kïterchï ECHOTYON nyinte saghatenyi, kïsïkisyö Repeka.

²² Kimiröy nyinte monïng cho le sala. Kïporyö monechay ompö muyenyi, kïlö kamanay, “Kïkany ato le nyï, kïpö ne kesöpchö nya?” Kïlenyona, kïwö akïtep ECHOTYON.

²³ Kïlenchï ECHOTYON, “Mi muyengu puntonï odeny Akï syölöy puntonichï kwodeny iyiyenyi. Owesitu anka kïsir anka, pöghisyechini nyo wow nyo mïnïng.”

²⁴ Otini kitïta osiswo Repeka cho pö lusyogh, kïyï monechi cho le sala.

²⁵ Ki pïrir nyo pö tagh akisapul portanyi tïkwïl le sampï. Kïlenyona, kekurö kaynenyi Esau.

²⁶ Kite keyï nyo pö odeny, kimi kïnömonu ewunyi tïtïny pö Esau, kïlenyona, kekurö kaynenyi Yakopo. Kitïng Isak könyis 65 atoni kisïköy korkenyi monechoni.

Kalta Esau mantanyi nyo pö poretnan

²⁷ Kïyetu werchay, kïlïkwï Esau sökosin nyo ngöghom, chi nyo kichömöy kïtöpuno wuw, wölo kitalase Yakopo, chi nyo kimöngöy emen.

²⁸ Kïcham Isak Esau tya ompöwölo kichömöy kwomöy pany cho kipkono sakas, wölo kicham Repeka Yakopo.

²⁹ Kimi asistanka Yakopo kughoghöy marakwen cho kïkuro denkun. Kwituna Esau sakastanyi, kisutate nyoman.

³⁰ Kïlenyona kïlenchï Yakopo, “Kameghan kömöy, kaykay konante sutechona pïröch oyup.” (Nka nyoni kikitö nyinte kaynata Edom.)

³¹ Kïlenchï Yakopo, “Nyo pö tagh olwanïn mantangu nyo pö poretnan.”

³² Kïlö Esau, “Nya kïle choni! Anyï karich ameghan, nyiwu ne mantanyan nyo pö yiyö ompö ani?”

³³ Kïlenchï Yakopo, “Omwanïn muma nyo pö tagh.” Kïlenyona, kwomchï Esau muma, kutö Yakopo mantanyi nyo pö poretnan.

³⁴ Kutö nyu Yakopo Esau makatyan nko omisyonay pö denkun, kwam akïgha akïnget kïwö. Kïlenyona, kïsas Esau mantanyi nyo pö poretnan.