TOWUNÖT 20 - PIPÏLIA

¹ Kiweghö Apraam Mamre kutang Nekep* akïmang kwenu Kades nko Syur akïmang kite wölnö le Kerar.

² Akwotini kimi wölini, kïmwochï pich Apraam lö ki cheptöngwa Sara nyini kile korkenyi. Kïlenyona, kwip Apimelek nyo kile pöytoghinto Kerar.

³ Wölo kungwïn Tororöt wölo mi Apimelek ompö kirwotïtogh akïlenchï, “Ichinyi mïntïrïch ompöwölo kechenganyi kokonï, akï koko chi nyinte.”

⁴ Wölo melö kökinyorï Apimelek Sara, kïlenyona kïlö Apimelek, “Echotyon, ipörenyi so pich cho puryö lelut?

⁵ Melö Apraam so nyo kimwa lö cheptöngwa nyinte? Akïmwa korkenyi tïkwïl ngat lö werïngwa nyinte? Kaghan ngölyontonete ompö mïkulögh nyo puryö sïmnyontön, puryö kïgh nyo kalelan.”

⁶ Atolapay kïlenchï Tororöt ompö kirwotïtogh, “Owöy, onkïtön lö keghanyi ngölyontononi ompö mïkulögh nyo puryö sïmnyontön, akwani nyini katagheninyi tömeghwanïn ngokï nka nyoni melö kyochömunyi swanga nyinte.

⁷ Kïlenyona ye nyu, yodena nyinte kïwö wölo mi santenyi, werkoyon chichoni nyo muköy kïsoghunyi tömemegh. Wölo ato meyodenyinye, inkïtï lö imeghenyi nyo mötïny nko piköku löwïr.”

⁸ Kïlenyona, kïnget Apimelek nyini le kiwasan akïkur pikachi löwïr cho le kirurichi akïmwochï ngalechay pö kirwotïtogh löwïr, kwotyö pïchay nyoman.

⁹ Ato mi löt kïkur Apimelek Apraam akïtep lö, “Ne kitö nyï keghwechanyi? Kïgh ne nyo kolelunyi tepkaninyi ngokï aipchï paytaghtanyan kinyarat nyo lata nyï? Keghwaninyi ngal cho mömïchinicha nyonikïny.”

¹⁰ Kïtas tagh Apimelek kïtep ngat lö, “Kenonenyi ne teghanyi lenyoni?”

¹¹ Kuyokyï Apraam lö, “Kaghan lenyoni ompöwölo kolentan puryö chi nyo woghöy Tororöt ompö wölete, akolentan ngat töptoy opöranïkwa atachenga korkenyan.

¹² Amwowokwa nyoman lö cheptöncha nyinte nyo pö paponyan, wölo melö nyo pö yonyan, opön nyu nyinte.

¹³ Kïlenyona, otini kiyonwanïn Tororöt ongetunö koto paponyu, atepan nyinte kungarakanïn kïmwochï pich ompö wop anka tïkwïl nyo kïpetecha lö ochan werïngwa.”

¹⁴ Kïlenyona, kuyokyï Apimelek Apraam korkenyi Sara akutö kechir nko tïch nko sekey.

¹⁵ Amelö choni opïn kïlenchï Apraam, “Topöne koronete kïmïkul, nyinyan. Kïla wop anka tïkwïl wölo kemököy mönge.”

¹⁶ Akïlenchï Sara, “Otöninan werïnkwa ropïyeni silpa cho le 1,000 tökukïniniechï pïchï löwïr mi nko nyi lö metïngetenyinye lelut aichinyi chi pö man ompö wölo mi chane.”

¹⁷ Atolapay kïsagh Apraam Tororöt kusop Apimelek nko korkenyi nko tipichi cho pö pöghisyö lapay, kïsïch chane monïng.

¹⁸ Ompöwölo kirat ECHOTYON kor löwïr cho kimi kö pö Apimelek ompö ngal cho kighisyö ompö Sara koko Apraam.