TOWUNÖT 16 - PIPÏLIA

¹ Kitomönye kïyichï Saray pontenyi Apram monïng. Wölo kitïng työ nyo kingwïno koro Misri nyo kikuro Akar nyo kile chepö monïng.

² Kïlenchï Saray Apram, “Kiratanïn ECHOTYON nyo melö tosïkan ye monïng. Rïwö nko chepï pöghisyewanïn töptoy osïkonan monïng nyinte.” Kïcham Apram ngala Saray.

³ Kïlenyona, kutö Saray Apram Akar chepay kingwïna Misri kïlïkwï chemïnïngwenyi.* Kikikïtöpö Apram koro Kanan könyis taman otini kighisyö ngalechoni.

⁴ Kirï Apram nko Akar, kïsïkisyö. Akïtökïnyini lawel kisïwa lö kyosïkisyö, kïwechï kïkwol kegh akïsas Saray.

⁵ Kïlenchï Saray Apram, “Nya kïlïkwï parakungu ghöyityö nyo kakighwanïn. Kyokoninyi chepï pöghisyewanïn, wölo otini kisïkï lö kyosïkisyö, kïwechï kïsasanïn. Nya kurwokwanïn ECHOTYON nko nyi lö ngo nyo tenate!”

⁶ Wölo kïlenchï Apram Saray, “Sekeyontengu nyinte akïmi moriku. Ighchinö nyinte kïle wölini kemökenyi.” Kïlenyona, kunyaril kong Saray Akar ntökuperta.

⁷ Kïtuyeghö malaykayanta ECHOTYON Akar ompö kö pö pögh nyo kimi surkwen ompö or nyo wetöy kutöngöy Syur.

⁸ Kïtep malaykayantanay Akar lö, “Ingwïnonyi onö aiwetenyi onö?” Kuyokyï Akar lö, “Orïponan wölo mi yonyan Saray.”

⁹ Kïlenchï malaykayantanay, “Mïlena wölini mi nyinte aipöghisyechï ompö tölosyö.”

¹⁰ Atolapay kïlö malaykayantanay, “Okoninyi monïng cho makïrar.

¹¹ Iyiyenyi monïng nyo le weri aikuronyi kaynenyi Ismael, ompöwölo kilïm ECHOTYON lokeko nyarïltangu.

¹² Wölo töpo werïngu le sïkïryö nyo körom ompö kwenu pich, poryegho nyinte pich löwïr, akïporyegho chi anka tïkwïl nyinte. Pesyot nyinte nko werkökwa löwïr.”

¹³ Kïkurö Akar kaynata ECHOTYON nyini kingalan nko nyinte Tororöt nyo sïwïyi ompöwölo kinonchï kegh lö, “Kosöchan Tororöt yeteyi nyoman, Tororöt nyo sïwïyi akwanyï tochan satate?”

¹⁴ Nka nyoni kuro pich kö pö pögh nyo mi kwenu Kades nko Pered, “Kö pö pögho Nyinte nyo Satate nyo Sïwïyanïn.”

¹⁵ Kïyichï Akar Apram worö, kïkurö Apram kaynenyi Ismael.

¹⁶ Kitïng Apram könyis 86 otini kiyï Ismael.