TOWUNÖT 13 - PIPÏLIA

¹ Kïngetunö Apram koro Misri akïwö kutang okumpö löt. Kimi nko korkenyi nko tïkuchi löwïr nko Lot tïkwïl.

² Ki sïkön Apram nyoman, kitïng kechir nko ngaror nko tïch nko ropïyen nko koltin.

³ Kulet tagh nko pantanyi kïngetunö okumpö tagh ntökwitï Petel, wölo kipörtochï emenyi, kwenu Petel nko Ai,

⁴ atoni ato kinya kïtekyineghö ECHOTYON ato kïpelo amöros. Kïsagha Apram ECHOTYON atoni.

⁵ Kitïng Lot tïkwïl nyo kirutö nko Apram okwotïno tïch nko cho pö kechir nko emen.

⁶ Kïlenyona kïmïnïngit koronay ompö chane kwodeny tïkwïl ompöwölo kichang kyakikwa.

⁷ Kwitï syala nyo kingwïna pipö Apram cho kile mösöw nko cho pö Lot. Kimöngöy osiswechoni pipö Kanan nko cho pö Peris.

⁸ Kïlenyona kïlenchï Apram Lot, “Mömïchininye kïrumunö syala kwenuncha anta kwenuto mösöweku nko chichan, ompöwölo kïchicha pipö or akonga.

⁹ Nyo mïchini kepesyenöcha. Kïla nyo le nyi wop anka tïkwïl nyo kemach. Ato ikïlanyi okumpö löt owan okumpö tagh.”

¹⁰ Kïsyol Lot konyichi akïsïwa mpöghoghyo Yordan kïmïkul wölini kinyïghï pögh kïlïkwï, otini kitomönye kuwur ECHOTYON Sodoma nko Komora, kikarkegh nko para ECHOTYON, nyo kilata koro Misri ato kitöngöy Soar.

¹¹ Kïlenyona, kïkïlchï kegh Lot mpöghoghyo Yordan kïmïkul akunategha kegh kutang okumpö kongasis. Nka nyoni wölini kipesyö chane kwodeny kïlïkwï.

¹² Kïmang Apram koro Kanan, kïmang Lot kwenu kanastin cho kimi mpöghogh akïparta emenyi ato lekïto Sodoma,

¹³ Ki ghach pich cho kimi Sodoma, kighchï ECHOTYON ngokï cho ghach.

Köwö Apram Epron

¹⁴ Kikany kïpesyö Lot nko Apram, kïlenchï ECHOTYON Apram, “Topöne lasiny wop löwïr ompö atoni imitenyi.

¹⁵ Okoninyi nko moneku koronete kïlïkwï nyengu kokay.

¹⁶ Oghan moneku kïchongitu le terïtyonto ngwïny, kïle wölini memukönye chi ntökuyit terïtyonto ngwïny, kïmemukönye chi tïkwïl ntökuyit moneku!

¹⁷ Wïyö westeghenö ngwïny kïmïkul, wölini le köghïntö nko töpesïntö, ompöwölo okoninyi.”

¹⁸ Kïlenyona, kunget Apram emenichi akïwö kutang ato kimi keti Mamre cho tïlilöch ompö Epron akïtekyï ECHOTYON ato kïpelo amöros.