TOWUNÖT 11 - PIPÏLIA

¹ Kingölonöy pich otini le tagh kut akonga akipöghisyegho ngalechini akonga.

² Kïkany otini kiwuwotö pich kutang kongasis, kwitïta tömko Papilonia kïmang wölini.

³ Atolapay kïmwochinö lö, “Ne, apkana kegha mataparen akepel lasiny.” Kitïng chane mataparen cho kitektoy nko lam cho kituyegho matapareni.

⁴ Kïmwochinö lö, “Ketekyinö kegh kanasyan nko pchörï nyo kogh nyo itöy yïm, tökemuka kerumtenö tömökïtoyö keghömï ngwïny kïmïkul.”

⁵ Atolapay kïrökï ECHOTYON ngwïny kuros kanasyantanay nko pchörinay kitek pïchay,

⁶ kïlö ECHOTYON, “Arose nyu, pich akonga pïchï, akïngölonöy kut akonga akwanyï ye kanya kutor ngalechï akïtomönye ato lekït kwigh kïgh anka tïkwïl nyo mököy kwighöy!

⁷ Apkana keröytenö tökewura ngalekwa tömökïlïmchinö chane nko chane.”

⁸ Kïlenyona, kutoyö ECHOTYON pïchay kïghömï ngwïny kïmïkul, kïpïstö tekatanay pö kanasyan.

⁹ Kïlenyona, kekurö kaynata kanasyantanay Papilon, ompöwölo kiwura atoni ECHOTYON kutïwa pipö ngwïny kïmïkul. Kitoyeghö ECHOTYON chane wöloni kïghömï ngwïny kïmïkul.

Monïngo Syem

¹⁰ Achï monïngo Syem. Kiwer könyiswö odeny otini kiwonyö puseryonta akitïng Syem könyis 100, kïsïch werïnyi Arpaksyad,

¹¹ kïtöpö ngat könyis 500, kïsïch monïnge walaka cho le wor nko tipïn.

¹² Otini kitïta Arpaksyad könyis 35, kïsïch werïnyi Syela,

¹³ kïtöpö ngat könyis 403 kïsïch monïnge walaka cho le wor nko tipïn.

¹⁴ Otini kitïta Syela könyis 30, kïsïch werïnyi Eper,

¹⁵ kïtöpö ngat könyis 403 kïsïch monïnge walaka cho le wor nko tipïn.

¹⁶ Otini kitïta Eper könyis 34, kïsïch werïnyi Pelek,

¹⁷ kïtöpö ngat könyis 430 kïsïch monïnge walaka cho le wor nko tipïn.

¹⁸ Otini kitïta Pelek könyis 30, kïsïch werïnyi Reu,

¹⁹ kïtöpö ngat könyis 209 kïsïch monïnge walaka cho le wor nko tipïn.

²⁰ Otini kitïta Reu könyis 32, kïsïch werïnyi Seruk,

²¹ kïtöpö ngat könyis 207 kïsïch monïnge walaka cho le wor nko tipïn.

²² Otini kitïta Seruk könyis 30, kïsïch werïnyi Naor,

²³ kïtöpö ngat könyis 200, kïsïch monïnge walaka cho le wor nko tipïn.

²⁴ Otini kitïta Naor könyis 29, kïsïch werïnyi Tera,

²⁵ kïtöpö ngat könyis 119, kïsïch monïnge walaka cho le wor nko tipïn.

²⁶ Otini kitïta Tera könyis 70, kïsïch Apram nko Naor nko Aran.

Monïngo Tera

²⁷ Achï monïngo Tera, nyo kile papoto Apram nko Naor nko Aran, ki papoto Lot Aran,

²⁸ kïröpösyï Aran korengwa wölini kikïyichï le kanasyanta Ur nyo pö Papilonia otini kitökïsöpöy paponyi Tera.

²⁹ Kwip Apram Saray, kwip Naor Milka, chepö Aran nyo kile papoto Iska.

³⁰ Kimösïknye Saray monïng ompöwölo ki sonö nyinte.

³¹ Kumït Tera werïnyi Apram nko Lot kukötanyi nyo kile wero Aran nko potïchtanyi Saray koko Apram. Kïwuwö wöloni chane lapay le Ur nyo pö Papilonia kïpa kutang koro Kanan. Wölo otini kitïta chane Aran, kïtïpï wöloni.

³² Kïröpösyï Tera wöloni akitïng könyis 205.