SEPANIA 2 - PIPÏLIA

Körirchï Sepania pich kïkötö ngokikwa

¹ Nyi we koronï metïng arasï, chïkana aikany kïpköchin ngala,

² kïtomö kepuktokwa le morïr cho kutïtoy yomat, akïtomö kwitwokwa nörekyo ECHOTYON nyo nöghöy le ma.

³ Ayara ECHOTYON wey, akwa cho ochï tölose, akwa cho orïpöy kirurutkachi. Agha man, ap kegh ngwïny. Töptoy ana ochïwïtyonekwa mönyorwok sito ECHOTYON asispa nörekyenyi.

Kinyarata pöröris pö Israel

⁴ Wuwo pich kanasyanta Kasa, lïku kïratyan kanasyanta Askelon, kitulöy pipö kanasyanta Asdod pöghet kwen aketïp kanasyanta Ekron lökïr.

⁵ Heywey akwa cho omöngöy sörömu nanam, akwa pipö Keret, kikumanekwa ECHOTYON, akwa pipö Kanan ompö koro Pilisti! Owongokwa tömökïminye ompö akong nyo ngötu.

⁶ Kïkany koronï mi sörömu nanam, lïku wuw nyo möngöy akuyakwï mösöwo kyakikwa.

⁷ Mïlöy pipö Yuda cho kingötï korononi akuyakwï kyakikwa. Pkonöy kïmöngöy kori kanasyanta Askelon, ompöwölo soyönöy ECHOTYON Tororöt pö pipö Yuda kïnyorï ngat tïkwïn.

⁸ Mwoghöy ECHOTYON Kimuktoghin lö, “Kalïman kimwaghata pipö Moap, nko mïnata pipö Amon cho kamïn piköchan akïkwol kegh ompöwölo kama kat korengwa.

⁹ Kïlenyona, le ato ochan satate ECHOTYON Kimuktoghin, Tororöt pö Israel, owolwolan lö, ‘Oghan Moap nko Amon le Sodoma nko Komora. Lïku koro kato nko ngormöm akunyara kokay.’ Pkonöy nyu piköchan cho köngötï kïchengo tïku akïmïl korengwa.”

¹⁰ Nka nyoni nyu sitöt nyo nyoru chane akwompö menötengwa, nko wölï kemwa akïmïn pipö ECHOTYON Kimuktoghin.

¹¹ Ighöy ECHOTYON pipö Moap nko Amon kïmïghyö, wongöy tororötino putintön ompö ngwïny le kwïle, atolapay kïsagh pipö ngwïny kïmïkul ECHOTYON Kimuktoghin, ompö koroskökwa.

¹² Akwa pipö Kusyi, pörokwa tïkwïl ECHOTYON!

¹³ Nyoröy ompö owesyenyi koro Asirya nyo mi okumpö löt. Ighöy nyinte kanasyanta Ninawi kïlïkwï kïratyan, lïku surkwen nyo puryö pögh,

¹⁴ akïlïku wölo rusot kyakï nko tïpö wudïn, wölo möngöy kukayoyï nko chemasinchen. Tumo pyukïktinö tïrisyeni kïratiskachi, ompöwölo kïpïtöy kori kïngotï keti kö opïn.

¹⁵ Nka nyete kïgh nyo igho ompö kanasyantanï kip kegh yïm, nyï nonchini kegh lö, “Möminye kanasyan anka nyo karkegh nko ani.” Anyï kalïkwï yenyu kïratyan nyo möngöy tïpö wudïn. Pïrpiröy chi anka möt nyo weröy kanasyantanoni akwotyö nyoman!