SAKARIA 9 - PIPÏLIA

Kirwokyini pöröris pö Israel

¹ Anyï ngölyon nyo kamwa ECHOTYON, Nyoru sitöt nyo mötïny koro Adraki nko kanasyanta Damaska. Ompöwölo pö ECHOTYON kanastina Sirya, kïle wölo chechi tïkwïl pipö ortïna Israel löwïr.

² Nyoru sitöt tïkwïl kanasyanta Amati nyo poyegho koro Adraki, amöngötunye tïkwïl kanasyanta Tiro nko Sidon, kïrkegh kïmen, lö tïng ngöghomnyö nyo wow.

³ Kitekyï kegh kanasyanta Tiro nayat nyo anger. Akï kïrkegh kitïkumchï kegh koltin nko silpa cho kinyam le terïtyon nyo kïtïkyini ngwïny,

⁴ Wölo chengoy Echotyon nyinte kïgh anka tïkwïl nyo tïng, akïwirchï sïkönötenyi nanam, akïpela ma kanasyantenyi kuwonyö lömïs.

⁵ Sïwïyi choni löwïr kanasyanta Askelon akïmïgh. Sïwïyi tïkwïl kanasyanta kasa akuchir kupelpel terït. Chiröy tïkwïl kanasyanta Ekron, ompöwölo potöy kikönötengwa lö weng. Meghöy pöytoghinto kanasyanta Kasa. Kïtoyeghö pich kanasyanta Askelon kïlïkwï kïratyan.

⁶ Pkonöy pich cho kikörokör kegh kïmang kanasyanta Asdod. Owongan menöto pipö Pilisti.

⁷ Mochömchinanye chane kwam ngat peny nyo mi nko kisön, amölïtönye kutingwa omisyö nyo taghate. Lïku chichan pich löwïr cho kingötï. Oyitan kïlïkwï akonga nko pipö ortïna Yuda Lïku chicha pipö Ekron le pipö Yepusi.

⁸ Oripan ante korenyu tömöngisngis lïkos pö koros walaka. Mopïsinanye ngat kepïr piköchan, ompöwölo kyasïwan ante chopat nyo kyam piköchan.

Pöytoghinto kalya nyo ngwïnöy

⁹ Akwa pipö Sayon,* ongörekyenö nyoman! Akwa pipö Yerusalem, oteghyenö ompö ngörekyö! Anyona pöytoghintenkwa ketï! Ketï ompö turönöt nko rïntagh! Talase nyinte akï wegho sïkïryö akï sïkïrye nyo le moda!

¹⁰ Lentöy ECHOTYON, “Owonyan nkarino lïk cho chutöy angoletino Epraim, nko cho pkonöy kanasyanta Yerusalem. Oriyan kïwantis pö poryot. Ipchini nyu nyinte pipö koros kalya, yöstoy paytaghtanyi kïngeta nanam ntökwit nanam. Ngeto lalwa Yuparet ntökwit söremwok pö ngwïny.”

Kimïlisyö pipö Tororöt

¹¹ Lentöy ECHOTYON, “Kïle otini kyaman muma* nko akwa nyo kikikïninieghö kisön, otyokan pïnotkökwa cho lenye ratan cho mi pïrïm nyo mamïnïng.

¹² Akwa we pïnot cho otïng kikönöt, omïlisyenö osorunö wölo oghïpcheghoy. Omwowokwa ye nyu lö, Kyonyorukwa nyörilwok cho chang, wölo osoyönokwa kïnyïl odeny ompö choni.

¹³ Lïku Yuda kwantinyan, kïlïkwï Israel koti Ilïkunenyi we Sayon* chok nyo opörenan pipö Krik. Onömeninyi yïm le choko nyakan.”

¹⁴ Ngwïnchini ECHOTYON pikachi, akïwutïtö kotichi cho petöy le kiryalon. Kutöy ECHOTYON konti poryot, akuchumï nko pïpïch nyo ngwïno kumporö.

¹⁵ Ripöy ECHOTYON Kimuktoghin pikachi, akumï pikachi kunyar pungkakwa. Teghyot kïpöröy pungkakwa le ptamasis mïltoy kisönkökwa kuyinta le cho pö kyaki amöros, cho kïmïluno otupö akemïlchï wölo kïpelo amöros.

¹⁶ Söru chane asisoni ECHOTYON Tororötïngwa ompöwölo chane kï kechiryechi. Kwörkwersot chane ompö korenyi, Lata koghïn cho pö olyot nyo wow ompö tenta nyo kilokyini möt.

¹⁷ Pïchighöchitu akïkaramachitu chane nyoman! Nörsot chumwak ompöwölo chang pagh nko dipay.*