SAKARIA 8 - PIPÏLIA

Keyomis ECHOTYON keyokyï Yerusalem ororyenyi

¹ Kingwïnchanïn ngölyonto ECHOTYON Kimuktoghin nyo lentöy,

² “Lentöy ECHOTYON Kimuktoghin, ochan söstoghin nyoman ompö Sayon,* ochan söstoghinto kanasyantanoni ompö nörekyo nyo ngwan.

³ Omïlenan Sayon amang Yerusalem. Kïkuröy Yerusalem asoni lö, ‘Kanasyan nyo ghanate,’ kekurö kutïng pö ECHOTYON Kimuktoghin, ‘Kutïng nyo tïlil!’

⁴ Kïsöchini ngat ortïna Yerusalem poy nko kokon kïtököntoy lïkupkökwa ompöwölo kiyositu nyoman.

⁵ Nyïghiti karachïna nko tipïn cho pironchot ortïna Yerusalem.

⁶ “Lentöy ECHOTYON Kimuktoghin, ato osïwïyekwa lö memukisyonye ngalechoni, olentekwa memukisyonye tïkwïl ompö ani?

⁷ Osörunenan piköchan koros cho mi okumpö kongasis nko ta

⁸ atolapay aghamïtwan kïpka kanasyanta Yerusalem. Lïku nyu chane piköchan, alïkwan Tororötïngwa. Opöytenan chane ompö kighanat nko man.”

⁹ Lentöy ECHOTYON Kimuktoghin, “Osïkö nyakanat akwa cho kalïm ngalechï mwoghöy werkoy kïngata ketor teksyo Kö pö Tororöt Kimuktoghin.

¹⁰ Kimemukönye chi ompö osiswechoni kukir pich ato kwigh pöghisyö anta pöghisyeghö kyaki chi ompöwölo kichang röpïyen cho kikïghoktoy. Kimöminye ompö kalya osiswechoni ompöwölo kyowulyan pich löwïr kïporyö.

¹¹ Wölo omwoghan ante ECHOTYON Kimuktoghin lö melö toghchinan ngat pipö koronï cho kingötï le wölo kyoghchan tagh.

¹² Yinöy ketikwa akwa akïrïröy kïgh anka tïkwïl nyo pitoy ngwïny. Osoyönan piköchan löwïr cho kingötï.

¹³ Akwa we pipö Yuda nko Israel, mowöghisyö! Nyo pö nyoman, ompö osis cho kikuwer kiyitokwa pipö punton le pich cho kikïchïp! Wölo ye osörwokwa, alïkukwa pich cho soyönote akï cho nyorchini piko walaka kisoyonöt. Kïlenyona, osïko nyakanat!”

¹⁴ Lentöy ECHOTYON Kimuktoghin, “Kïle otini kimamlanye löt otö papotïnekwa sitöt nyo puryö kisyonchin ato kyonörekyan chane,

¹⁵ owetan oghchini nyo mötïny pipö Yerusalem nko Yuda nyo karam. Kïlenyona, mowöghisyö.

¹⁶ “Achï tïkwïn cho mïchini agha, angalana man amutyï pich kalya.

¹⁷ Motötyï kegh ghöyityö amacham am muma ayokyï kegh amwagh putintön. Ompöwölo otöghan nyoman tïkuchoni löwïr.” Mwoghöy ECHOTYON.

¹⁸ Kingwïnchanïn ngölyonto ECHOTYON nyo lentöy,

¹⁹ “Lentöy ECHOTYON Kimuktoghin, lïku kïrurata nyo pö arawa angwan nko nyo pö arawa taman osiswo ngörekyö nko turönöt akï osiswo ichontin ompö pipö Yuda. Kïlenyona achamena kegh man nko kalya.”

²⁰ Lentöy ECHOTYON Kimuktoghin, “Itïtoy ato supuy kegh pipö kanastin cho chang kanasyanta Yerusalem.

²¹ Mwochini pipö kanasyan akonga piko kanasyante anka lö, ‘Wechara! Apkana kepe kesagha ECHOTYON Kimuktoghin akesom nyinte kusoyönech!’

²² Pkonöy pich cho chang nyoman akïpka koroswö cho tïng owesyö nyo wow kïsoghanïn akïsomanïn osoyön chane.”

²³ Lentöy ECHOTYON Kimuktoghin, “Pkonöy pipö punton cho le taman akïsïkwïr chi pö Yaudi akonga kïlenchini, ‘Kepe tïkwïl ompöwölo kakïlïmacha lö mi Tororöt nko nyi.’ ”