SAKARIA 5 - PIPÏLIA

Sïwïyaghpa palalyan nyo kipil kïmïr yïm

¹ Osyolön konyïn ngat asïwan palalyan nyo pilöy kïmïröy yïm.

² Kitepanïn malaykayan lö, “Kesïwenyi ne?” Olenchan, “Kasïwan palalyan nyo pilöy kïmïröy yïm nyo le miten mut nko angwan ompö koghïn akï miten angwan nko nïsï ompö töpesïn.”

³ Atolapay kïlenchanïn kikikirchï palalyantanoni ngal cho lentöy kïchïpöy ngwïny kïmïkul. Kikikirchï wop akonga lö, “Kïtïghöy chorï ompö kor,” kekirchï woptö nyinö anka lö, “Kïtïghöy pich cho omöy muma ompö putintön.”

⁴ Lentöy ECHOTYON Kimuktoghin, “Oyoktonan chïpö kïlït kori chorï nko pich cho omöy muma ompö putintön. Omöy chane chïponï nko ketiko kot nko koghi cho kikïtekta!”

Sïwïyaghpa korka nyo mi köröp ori

⁵ Atolapay kunokwï kïrikanïn malaykayan nyo kingölonöy nko ani akïlenchanïn, “Rosa, anyona Kïgh ngwïnöy!”

⁶ Atepan lö, “Akï ne nyï nya?” Kïlenchanïn, “Köröp nyete nyo poru ngoki ngwïny kïmïkul.”

⁷ Otini kikïyat köröwonto köröponay nyo kikigha karïna tay, atanganyan asïwa korka nyo kimi ori!

⁸ Kïlenchanïn malaykayan, “Isïwiyenyi kokonï? Kiporunogh nyinte nyo pö ngokï.” Akïyumchï kokonay köröpe ori akïkar.

⁹ Atolapay osyolön konyïn asïwan kor odeny cho kitïng köpepoy cho lata cho pö mötong. Kipilu kutöngwanïn atolapay kuwokï köröponay akwip kïpus yïm.

¹⁰ Atepan malaykayan lö, “Ipöy onö köröpe nya?”

¹¹ Kïlenchanïn, “Kep koro Papilonia, wölo kïpetöy ketekyini kö aketö kïtöpö ori.”