SAKARIA 2 - PIPÏLIA

Sïwïyaghpa pörkoyö nyo kipimtoy

¹ Osyolön konyïn asïwan chi nyo nömöy pörköyö nyo kipimtoy.

² Atepan lö, “Iwetenyi onö?” Kïlö, “Owetan opimöy koghïn nko töpesïn pö Yerusalem.”

³ Kïwö tagh malaykayantanay kingölonöy nko ani, kungwïn anka kuryam tïkwïl

⁴ akïlenchï, “Rïpö mwochinö karöchïnintoninö lö, chongitu pich nyoman kanasyanta Yerusalem nyo memukonye ketekyï nïyet ompöwölo möngörïnye pich nko kyak cho mi ori.

⁵ Ompöwölo lentöy ECHOTYON, ‘Olïkunan ante nayatu ma nyo witöy Yerusalem. Otöponan orinyi alïkwï ororyenyi.’ ”

Kikur ECHOTYON pikachi kïmïlisyö kaw

⁶ Kikur ECHOTYON pikachi kïlentöy, “Akwa wey! Oryöwunenö okumpö kuntoka wölo kyotoytochokwa le wölini okutïtonan yomat kïyasta!

⁷ Akwa cho omi koro Papilon, oryöwunö lawel osorï Sayon!”*

⁸ Kiyoktanïn ECHOTYON Kimuktoghin ompö ororyenyi owö omwochï koros cho kirang pikachi kipa pïnotön lö, “Kor anka tïkwïl nyo swongöy piköchan kïlenye ato körïtanïn kong nyini tuw.

⁹ Otökan ante ECHOTYON koroschini opïsinan piköchan kïngötöru koros cho kingatar korengwa akwigh mötwor, kïngatar koroschoni.”

¹⁰ Lentöy ECHOTYON, “Tumö aingarak we chepö Sayon! Ongwïnan omöngöy kwenunkwa!”

¹¹ Pkonöy koroswö osiswechoni akïlinyö nko ECHOTYON. Lïku nyu chane piköchan, amangan kwenungwa. Onkïtukwa nyu lö, ECHOTYON Kimuktoghin nyo kiyokwanïn wölo omikwa.

¹² Pöyitu ngat atoni koro Yuda ECHOTYON nyo chömo kegh tya ompö koronï tïlil akïkïlchï kegh ngat kanasyanta Yerusalem.

¹³ Kïlenyona sisa chi anka tïkwïl lasay ompö tawu ECHOTYON ompöwölo köngetunö nyinte möngenyi nyo tïlil.