SAKARIA 12 - PIPÏLIA

Sörunöto Yerusalem nyo tökungwïnöy

¹ Lentöy ECHOTYON nyo kikarkar yïmwöy akwigh ngwïny akutö söpon ptangengmöt,

² “Arosa! Oghan kanasyanta Yerusalem kïlïkwï kölöw kumïn! Pkonöy kïgheghöy koroswö cho lekïtino Yerusalem akïtömesyö kumes. Otini köporyeghö pung kanasyanta Yerusalem, poryegho tïkwïl kanastina Yuda löwïr.

³ Oghan asisoni Yerusalem kogh nyo nïkis ompö pich löwïr. Yörchini kegh kösotyö nyo ngwan koro anka tïkwïl nyo lentöy okölöngöy. Pkonöy koroswo ngwïny kïmïkul kïporyegho kanasyantanoni.

⁴ Oghan asisoni angoletino lïkos pö pung pö piköchan kïpotonchö akïköryö. Oghan tïkwïl pöryeghï cho pegho angoletinechoni kupilyö, wölo okomönan nyoman pipö Yuda.

⁵ Mwoghöy nyu atoni pipö ortïna Yuda lö, ‘Könyorï owesyö pipö Yerusalem nyo ketö ECHOTYON Kimuktoghin, Tororötïngwa.’

⁶ “Oghan osiswechoni pipö ortïna Yuda kïlïkwï ma nyo pelöy wuw, le ma nyo pelöy roro pagh. Pelöy koros cho le pöröris pö Yerusalem kuwonyo lömïs wölo ngötu pipö Yerusalem akïmöngisyö ompö kalya.

⁷ “Onyoghan ante ECHOTYON ongöroköy pipö Yuda kïnyorï rïntagh atö mep kegh yïm pipö ara pöytoghin Daudi nko pipö Yerusalem kïtïl pipö Yuda.

⁸ Oripan ante ECHOTYON asisoni pich cho möngöy kanasyanta Yerusalem. Lïmchini kegh chi nyo nyarkalal ompö kwenungwa lö otïng owesyö nyo kitïng pöytoghinto Daudi. Ntöghoghchini pipö ara pöytoghin Daudi pipö Yuda le malaykayanta ECHOTYON, anta le Tororöt.

⁹ Onyoran ompö asisoni punton löwïr cho pkonöy kupokyini Yerusalem.

¹⁰ “Onyïghitan mïkulöwu kisyonchin nko saghat pipö ara pöytoghin Daudi nko pipö kanasyanta Yerusalem. Ato topön chane nyinte nyo kipara chok, kïsönönchï le chi nyo sönönchini montanyi nyo le akonga atoma, anta le nyo kamegha poretyenyi.

¹¹ Wow sönönöto asisoni ompö Yerusalem, lata nyo kimi kanasyanta Adad Rimon ompö mpöghoghöyi koro Mekido.

¹² Sönönöy ngwïnya akwighöy lenyoni ompö ortïn akwotini sönönöy mi korï opïn, kïmi mïron opïn, pipö ara pöytoghin Daudi nko pipö ara Natan nko korukwa.

¹³ Pipö ara Lawi nko korukwa nko ara Syimey nko korukwa

¹⁴ akïlenyoni tïkwïl ompö pipö ortïne walaka cho köngötï.”