RUS 2 - PIPÏLIA

¹ Kitïng Naomi aywantenyi nyo kile sïkön nyo pö ara Elimelek nyo kikïkuro Poas.

² Kïlenchï Rus Naomi, “Nya owan paren ororotö pagh cho kedong, töptoy onyorunan ana chi nyo chömanïn.” Kïlenchï, “Wïyö cheptanyu.”

³ Kïwö nyu Rus paren kïrïpata pipö kasa löt tökurorotö pagh cho kedong, kichö kiwö ntökwit para Poas nyo pö ara Elimelek.

⁴ Kungwïna Poas Petleem akïlenchï chane, “Nya kïtöpö ECHOTYON nko akwa!” Kuyokyï pïchay lö, “Nya kusoyönïn ECHOTYON.”

⁵ Atolapay kïlenchï Poas mötworintenyi nyo kighyongchini pipö kasa, “Pö ngo chepï?”

⁶ Kuyokyï mötworintonay ghyongchini kösï lö, “Chepö ka Moap nyo kengwïn nko Naomi.

⁷ Kasaghecha nyinte lö, ‘Kaykay opïswante ororotö paghechona köchïntoy nko cho kedong.’ Kengwïn nyaye le tökwoghö nko ye tökïkwöghotoy, kïpoto ye ato kemuny kite.”

⁸ Kïlenchï Poas Rus, “Kolano cheptanyu, mewö irorotö par anka anta ipïstö nyï, wölo rïpanyi löt tipichï pöghisyewanïn.

⁹ Rosanyi paranete wölo köso pich pagh airïp chane. Komwochan piköchan tömöswanginyi. Nyo ato amïn maral iwö ighegh pögh cho mi tören cho körömï chane.”

¹⁰ Kungïrukö ntökwit ngwïny ompö konyït akïlenchï, “Ompö ne techamaninyi nyo kemukanyi ntesyonchanïn chi nyo le pïnotyon?”

¹¹ Wölo kuyokyï Poas lö, “Kyalïman ngal löwïr cho kighchinyi potïchtangu kïngata otini kirapas pontengu nko wölo kipïstenyi papongu nko yongu nko koreto pikökwo aingwïn koro pich cho melö kenkïtönyi.

¹² Nya kuyokun ECHOTYON choni lapay kighanyi, akïkonïn ECHOTYON Tororöt pö Israel ropöwon nyo wow nyo kengwïnanyi irïpchï nyinte tökïyetïn.”

¹³ Atolapay kïlö Rus, “Kechamaninyi we echotyontenyu, ompöwölo kesaghsaghaninyi aingölonchï cheptöngu nyo karam nko melö kochan akonga nyo pö tipichï pöghisyewunyi.”

¹⁴ Nyini kitïta ato kyomisïyi kïlenchï Poas nyinte, “Nyonö yi ama makatyan ainönokö sutö.” Kïlenyona kïtöpö Rus ngwïny kamasu kösichay atolapay kwonkoghchï Poas nyinte pagh cho kakïkel, kwomisyö ntökutuk.

¹⁵ Nyini kanget tökurorotö pagh, kïmwochï Poas pikachi lö, “Akanyakwa kïcheng ompö chini le rötutöy, moteghchï.

¹⁶ Angwïsyini walaka cho karatakwa apïsyï nyinte kïcheng makar kong.”

¹⁷ Kurorotö paranay ntökwimön atolapay kulï paghechay, kïlïkwï depö lö mït.

¹⁸ Kwip kutang kanasyan akuporchï potïchtanyi paghechini keror nko omisyonay ketuk.

¹⁹ Kïtep Naomi nyinte lö, “Kerorönyi para ngo asete? Akepöghisyeghenyi onö? Soyönote chichini kesyonchinyi.” Kïmwochï nyu Rus lö, “Komitan para chi nyo kïkuro Poas.”

²⁰ Kïlenchï Naomi nyinte, “Nya kusoyön ECHOTYON nyinte nyo möwutyeghonye köromnyenyi ompö cho sötote nko cho kimeghö.” Atolapay kïlenchï Naomi nyinte ngat, “Tïlya chichoni nyo lekït nyo pö arencha.”

²¹ Atolapay kïlö Rus chepay pö ka Moap, “Kölenchanïn, ‘Irïpata mötworichan ntökuwany kasa.’ ”

²² Kïlenchï nyu Naomi Rus, “Karam nyoman cheptanyu nyo kewestenyi nko mötworichi nyo antö kö para chi anka kötökisusinyi.”

²³ Kïlenyona kumpur ato lekït nko mötwori Poas kurorotö ntökïtenö kuwonyö kasa matay nko nkanun akïmang nko potïchtanyi.