RUMI 9 - PIPÏLIA

Tororöt nko pikachi

¹ Omwoghan man lö kyolinyan nko Kristo,* amomïranye put. Porwanïn tïkwïl lenyoni choghïntanyan ompö Mïkulögh nyo Tïlil.

² Nyo pö nyoman otïngetan mïghöt nyo wow nko ngwonïn nyo mewonyotnye ompö mïkulöwunyan,

³ akwompö piköcha cho kïpo kut akonga! Ntökemuko lö ngöroköy chane, kötolentan opï kö ani kegh nyo kochï chïpot akepesyon nko Kristo.

⁴ Pipö Israel chane, cho kikïl Tororöt kïlïkwï monechi akïngongchï ororyenyi akwam nyinte mumen nko chane akutö Kirurutkachi. Kikunkïtï chane saghata man akï chane cho kitach kiyomisut pö Tororöt.

⁵ Kipkana chane ara pipö Eprania cho tokunote. Akungwïna Kristo pichoni ompö ara por. Nya kïsala Tororöt nyo pöyu tïkwïn löwïr kokay. Amen.*

⁶ Amomwoghanye lö, mökunyiwïnye kïgh kiyomisöto Tororöt, ompöwölo melö pipö Tororöt pipö Israel löwïr.

⁷ Amelö monïngo Tororöt pipö ara Apraam löwïr. Kilenchï Tororöt Apraam, “Pkono Isak piko arengu cho kyoyomisunyi.”

⁸ Poru nyoni lö, mölïkucha monïngo Tororöt monïngo cho kikïyï ompö ara por, kïpoto cho kikïyï kïrïp kegh nko kiyomisöto Tororöt cho kiyitöy lö, monïngo Tororöt.

⁹ Ompöwölo kikïmwowï ayomis pö Tororöt ompö ngalechï, “Ongwïnan könyinïna ato teno nyete, sïköy nyu atoni Sara werïnyi.”

¹⁰ Amelö nyoni onkït, wölo kisïkisyö Repeka tïkwïl kïsïch werkachi odeny cho le sala cho kisïko papo akonga, nyoni kï kukötönyo Isak.

¹¹ Wölo tökïrumtö lasiny lö, ki Tororöt nyinte kegh nyo kikïl weri akonga kitomö keyï monechoni le sala, akitomöcha kwigh chane kïgh nyo karam anta nyo gha, atömanyïl kïrumtö lö, Tororöt nyinte kikïl ompö machatenyi nyo amelö ompö ighisyewut pö ptangengmöt,

¹² kïlenchï Tororöt yongwa, “Pöghisyechini weri nyo wow weri nyo mïnïng.”

¹³ Kïle wölo mwoghöy Kikirut lö, “Kyachaman Yakopo wölo ataghan Esau.”

¹⁴ Kïmwoghecha ne nyu nya? Meghönye Tororöt manï? Ewo!

¹⁵ Ompöwölo kimwochï nyinte Musa lö, “Osyonchinan chi anka tïkwïl nyo kosyonchï, asoghsoghan chi anka tïkwïl nyo kasaghsagh.”

¹⁶ Kïlenyona, chïchïmo kïgh anka tïkwïl kisyonöto Tororöt kïpoto, amelö ompö kïgh nyo mököy chi anta nyo ighöy nyinte.

¹⁷ Ompöwölo mwochini Kikirut Parao lö, “Kyaghinyi lïkuna pöytoghin, atopöghisyegheninyi aparta owesyenyan atökunkïtï pich kaynatenyan kïghömï ngwïny kïmïkul.”

¹⁸ Kïlenyona, syonchini Tororöt chi anka tïkwïl nyo kömököy, akwigh anka kïlïkwï tighin le wölo kömöktoy nyinte.

Nörekyo Tororöt nko kisyonötenyi

¹⁹ Töptoy tepanïn chi akong ompö akwa lö, “Ato lenyoni, kwompö ne nyu tökughechini Tororöt chi lö kalel? Ngo nyo muköy kupöpeköy machatenyi nya?”

²⁰ Wölo ilentenyi ptangengmöt ochï ngo nyo mölöy kegh nko Tororöt? Kilïmanyi tör nyo tepöy ighintenyi lö, “Kölö ne teghaninyi le nyï?”

²¹ Mötïngnye so ighinto tör man nyo pöghisyegho mönenyi lenyini kömököy? Ompö mönö akonga muköy kwigh tören odeny. Ighöy anka kïpöyit osiswo ichon, kwigh anka kïpöyit osis löwïr.

²² Lata nyoni tïkwïl wölo kida Tororöt. Kimököy kuporu nörekyenyi atökenkïtï owesyenyi. Kïlenyona, kïmïkukönchï nyinte tya pich cho kikikïker nörekyenyi akï cho kimi psach.

²³ Akimököy tïkwïl kïngongu ororyenyi nyo wow nyo kikemïlwecha cho kiketötwech kisyonötenyi, acha cho kisatech nyinte otini le könyisyok kenyorunö ororyenyi.

²⁴ Ompöwölo kichicha pich cho kikur nyinte amelö acha cho kikïpkana pipö Yaudi opïn, wölo cho kipkana pipö punton tïkwïl.

²⁵ Kimwa Tororöt nyinte ngalechï kïle wölo kikir werkoyon Osea lö, “Okuran pich cho kimelö piköchan lö, ‘Pikachu,’ akuran punton cho kimochömanye lö, ‘Chamankachu.’

²⁶ Akwompö atoni kikïmwochinegho chane lö, ‘Mochikwanye piköchan,’ kikuröy chane ompö atoni lö monïngo Tororöt nyo söpöy.”

²⁷ Kimwa Isaya tïkwïl paraku pipö Israel lö, “Kïrkegh köchang pipö Israel le ngayam cho mi sörömu nanam, wölo pich cho ngörï pat ompö chane cho kïsöru,

²⁸ ompöwölo mutöy Echotyon kirwokenyi ompö ngwïny lawel akuwany.”

²⁹ Lenye nyoni ngat ngölyon nyo kingor Isaya lö, “Ntökile nyo kimetukwechanye Echotyon Kimuktoghin monïng, kötökikewonyecha le pipö Sodoma nko pipö Komora.”

Saghata Paulö ompö pipö Israel

³⁰ Kïmwoghecha ne nyu nya? Könyorï pipö punton or nyo kiyityini man, ompö ara kighanat kïrkegh kimöyongöcha.

³¹ Otini wölo mönyorïcha ore pipö Israel cho kïsökosöy kirurut cho ighöy chane keyityï man ompö tawu Tororöt.

³² Ekwompö ne köny tömönyorï? Ompöwölo kitwayta kegh chane ighisyewutkökwa nyo kötetwochto kegh kighanat. Kupïtyeghö nyu chane koghay pïtyegho pich,

³³ kogh nyo ngölono Kikirut lö, “Asïwa ya lö, otöninan Sayon* kögh nyo kwötöy pich, ghat nyo ighöy pich kupïtyö. Wölo mösïkönye arasï anka tïkwïl nyo ghönöy nyinte.”