RUMI 8 - PIPÏLIA

¹ Kïlenyona nyu ye, mökurwokyininye Tororöt pich cho linyote nko Kristo* Yeso.

² Ompöwölo kakutyakanïn kirurut nyo pö Tororöt nyo ipkecha söpon, ongetunö kirurutyo ngokï nko meghat, otini kyolinyan nko Kristo Yeso.

³ Kigh Tororöt kïgh nyo kimemïnye kirurut kwigh, ompöwölo ki nyarkalal otöp pö ptangengmöt. Kilot Tororöt ngoki ptangengmöt, otini kiyonï Werïnyi kegh nyo kingwïn kitïng asïl pö ptangengmöt akuwur ngokï lödo.

⁴ Kigh Tororöt lenyoni atömanyïl kwitïta lasiny möchut pö Kirurut cho pö man ompö orincha, cho kïpestoy mïkulögh amelö ompö asïl pö ptangengmöt.

⁵ Ompöwölo pöytoy kinonut pö por cho rïpöy asïl pö ptangengmöt, wölo pöytoy kinonut pö pich Mïkulögh cho rïpöy cho pö Mïkulögh.

⁶ Ipu meghat kinonut pö por, wölo ipu söpon nko kalya kinonut pö Mïkulögh.

⁷ Ompöwölo chi nyo pöytoy kinonut pö por, kï punyonto Tororöt, ompöwölo mörïpönye kirurutyo Tororöt, akïmemukönye nyoman kïterchini.

⁸ Memuköcha pich cho rïpöy möchut pö por kwighöy Tororöt kïngarak.

⁹ Wölo melö orïpekwa otöp nyo pö por, orïpekwa cho pö Mïkulögh, ato man lö möngöy Mïkulöwu Tororöt orinkwa. Anka tïkwïl nyo mötïngnye Mïkulöwu Kristo, kïmelö nyenyi chichoni.

¹⁰ Wölo ato mi Kristo orinkwa, kïsöpchot mïkuliskökwa, ompöwölo kikeyityekwa man ompö tawu Tororöt, kïrkegh kömeghsot porwöyikwa akwompö ngokï.

¹¹ Ato mi orinkwa Mïkulöwu Tororöt nyo kigh Yeso kututunö ngwen, kwighöy Tororötnoni kigh Kristo Yeso kututunö ngwen porwöyikwa kïsöpchö, ompö Mïkulöwunoni mi orinkwa.

¹² Kïlenyona nyu tupchenichu, kïtïngetecha ghoksyö, wölo melö kemöngisyö le wölo möktoy otöptöncha nyo pö ptangengmöt.

¹³ Ompöwölo ato omöngisyekwa kïrïp kegh nko mökutko porwöyikwa, omeghyonekwa, wölo ato arïpakwa cho Mïkulögh otïghekwa ighisyewutkökwo cho ghach asöpchö.

¹⁴ Lapay cho ntöghoghchini Mïkulöwu Tororöt kekuro chane monïngo Tororöt.

¹⁵ Ompöwölo meghokwanye sekey Mïkulögh nyo kikonokwa Tororöt, amelö ighokwa onyökoröchitunö, wölo ighokwa alïkuna monïngo Tororöt akwighecha Mïkulöwunoni kekurö Tororöt lö, “Papo! Paponyu!”

¹⁶ Söwintönchin Mïkulöwunoni pö Tororöt nko mïkulöwecha lö, kichicha mönïngo Tororöt.

¹⁷ Akwompöwölo kichicha monechi, kenyorunecha kisoyönut löwïr cho rorchini nyinte pikachi, akenyorunecha ngat nko Kristo tïkwïn cho kirorchï Tororöt nyinte. Ompöwölo ato kinyarilecha kong nko Kristo, keghömecha ororyenyi nko nyinte.

Ororyö nyo pïnï

¹⁸ Moyitanye lö, kïgh kiwongunötö nyo pö ye ato kikongityö nko ororyö nyo tökïsis kengongwecha.

¹⁹ Ompöwölo köngöy kïgh anka tïkwïl nyo kikigh ompö emö nyo wow asis nyo ngongu Tororöt monechi.

²⁰ Ompöwölo kikitö tïkwïn löwïr cho kikigh kupotö kerötö, amelö ompö machatengwa kegh, wölo ompöwölo kicham Tororöt lenyoni. Wölo kïrkegh kïlenyoni, kïtökïmi kikönötö

²¹ lö, tökesöru tïkuchoni löwïr kïngetunö sekeynöno kiwurat, akïghamta akonga kityakata monïngo Tororöt nyo pö töngönchin.

²² Ompöwölo kinkïtöcha lö, chirsot tïkuchoni löwïr ompö ngwonïn nko ompö nyete le ye, le korkö nyo lusïyi.

²³ Amelö tïkuchoni kikigh opïn cho chirsot, wölo kïmitecha chete le acha tïkwïl kichïr ompö orinyo, cho kïtïng Mïkulögh nyini le ropöwonto Tororöt nyo pö tagh, otini kïköngecha nyinte kwighecha kelïkuna monechi, akenyorï kityakatenyi.

²⁴ Ompöwölo kikïsörwecha ompö kikönötononi, wölo ato sïwïyi chi kïgh nyo könöy, kïmelö tökïkikönöt nyoni. Ompöwölo chi ne nyo könöy kïgh nyo sïwïyi?

²⁵ Wölo ato kikönöcha kïgh nyo melö kïsïwïyecha, keköngisïyecha ompö mïkukönöt.

²⁶ Kïlenyenyoni tïkwïl, ngwïnöy Mïkulögh kungörokecha ompö nyörkölelyenyo, ompöwölo mökinkïtöchanye kesoghöy le wölini kömïchinecha kesoghe. Soghwecha Mïkulögh nyinte ompö sönönöto ngwonïn nyo melö kimuköy kemwoghe.

²⁷ Akï Tororöt nyinte nyini sïwïyi mïkulis pö pich ori, nyo nkït kïgh nyo nonöy Mïkulöwunoni, ompöwölo soghchini Mïkulöwunoni pipö Tororöt kïrïp kegh nko machata Tororöt.

²⁸ Kinkïtöcha lö, ompö tïkwïn lapay ighöy Tororöt kïgh anka tïkwïl karamit ompö pich cho chömöy nyinte, pich cho kikur nyinte kïrïp kegh nko machatenyi.

²⁹ Ompöwölo pich cho kinya Tororöt kïkïl kïngeta otini le könyisyok kï kilöwön lö lïku chane cho körökegh woptöngwa atökïkarkegh nko Werïnyi, atömanyïl kïlïkwï nyinte poret nyo kwenu monïngo Tororöt cho chang.

³⁰ Kïlenyona nyu, pïchoni kikïl nyinte kïngeta otini le könyisyok, cho kikïkur, akï pïchoni kikïkur cho kiyityï nyinte man, akï choni kiyityï man cho kitö kïgham ororyenyi.

Chomnyo Tororöt ompö Kristo Yeso

³¹ Kwoto lata choni ngalechï, kemwoghecha ne ngat nyu nya? Ato mi Tororöt okuntöncha, kï ngo nyo rïntonecha?

³² Nyinte nyini maghet Werïnyi kegh, wölo kikonï nyinte le amöros ompö acha löwïr. Akwato kigh lenyoni, kïmemukönyenyu kïkonecha nyinte tïkwïn löwïr cho karamach?

³³ Ngo nyu nyo rwokyini kïlanpa Tororöt nya? Puryö, ompöwölo Tororöt nyinte nyo kakïmwa lö, mötïngcha chane lelut.

³⁴ Mï ngo nyu nyo rwokyini chane? Puryö, ompöwölo Kristo Yeso nyo kima, atolapay kitutunö ngwen, akïmi ye ewu tagh nyo pö Tororöt. Mi nyinte ye kïsoghwecha!

³⁵ Ekï ngo nyu nyo muköy kupesyecha nko chomnyo Kristo? Muköy nyarïl anta kömpölelyö anta kichopata kong anta kikar anta meywontön anta tapan anta meghatï?

³⁶ Kïle wölo mwoghöy Kikirut lö, “Kïmitecha körköryo meghat kwimön ompö nyi kikongityonecha nko kechir cho kïpetöy keyengöy.”

³⁷ Wölo kïrïntonecha tïkuchoni löwïr, ompö kingörokut nyo ngwïno nyinte nyoni kichamecha.

³⁸ Ompöwölo onkïtön nyoman lö, möminye kïgh nyo muköy kupesyecha nko chomnyenyi. Memukönye meghat anta söpon anta malayken anta pöytoghi yïm walaka anta tïkwïn cho mi ye anta tïkwïn cho tökïsis kïpka anta cho tïng owesyö

³⁹ anta koros cho mi yïm tya anta cho mi ngwïny wölporö. Möminye kïgh anka tïkwïl nyo kikigh nyo muköy kupesyecha nka chomnyo Tororöt nyo kökïnyorucha ompö Kristo Yeso Echotyontenyo.