RUMI 7 - PIPÏLIA

¹ Tupchenichu, pköchinokwa lasiny, ngölyontonï omökan omwoghöy, ompöwölo ongölonchinan pich cho nkït kirurut. Pöytoy kirurut chi otini tökïsöpöy nyinte kïpoto.

² Kerose körkeyïn pö korka nyo kakep. Mwoghöy kirurut lö, mïchini kokononi kïtöpö nko santenyi otini tökïsöpöy, wölo otini kama santenyi, kutyaka nyu ompö kirurut cho kirat nyinte nko santenyi.

³ Kïlenyona nyu, ato töp kokononi kïmöngisyö nko chitö anka otini tökïsöpöy santenyi kekuro nyinte cheporesyan, wölo ato rapas santenyi kutyaka ompö kirurut, amelö tökekuro nyinte cheporesyan ato ip chitö anka.

⁴ Lenye nyoni tïkwïl ompö akwa tupchenichu, kyomeghyekwa tïkwïl ompö kirurut, ompöwölo ochikwa kareranpa por pö Kristo,* apokwa nyinte nyini kitutunö ngwen, atömanyïl kelïkwï pich cho tïng kinyiwut ompö ighisyo Tororöt.

⁵ Ompöwölo atanya kikïmöngisyecha kïrïp kegh nko asïltönyo nyo pö ptangengmöt, kingetngetöy kirurut pïrchin pö ngokï nyo kimi porwöyicha ntökïyi akwa meghat.

⁶ Wölo kiketyakenecha kirurut ye ompöwölo kikemeghecha ompö kïyoni kinamecha akïratecha. Kïlenyona nyu melö tökepöghisyechinecha Tororöt ngat le nyay pö köny nko kirurutchanya kikikir pö könyisyok, wölo kïpöghisyechinecha nyinte ye kïrïp kegh nko söpon nyo rel nyo pö mïkulögh.

Kirurut nko ngokï

⁷ Kïmwoghecha ne nyu nya? Ngokï so kirurut? Ewo! Wölo ntökimö kirurut, kitömonkïtönye ngokï lö, ne. Ompöwölo kitömonkïtunanye lö ne pïrchin ntökimamwa kirurut lö, “Mepïrchï tïpö pich.”

⁸ Wölo kinyorï ngokï pöroyïntanyi nyo kingetnget pïrchin anka tïkwïl, ompö orinyan. Ompöwölo ato möminye kirurut kï mötïngnye ngokï owesyö.

⁹ Kyomitan ante osöpöy ato le tagh kipuryö kirurut, wölo otini kitï kirurut, kututï ngokï, ameghan.

¹⁰ Kïwaghaka kirurutyonay kitepu söpon, kwipkanïn meghat.

¹¹ Ompöwölo kisïch ngokï pöroyïntanyi ompö kirurutyononi, kïlïsanïn nyu akïtïwanïn.

¹² Kïlenyona nyu, tïlilöch kirurut akï pö man akï karamach.

¹³ Poru ye so nyoni lö kipkanïn meghat kïgh nyo karam? Ewo! Ki ngokï choni kigh lenyoni otini kipöghisyeghö kïgh nyo karam, kwipkanïn meghat atökupörï kegh ngokï lasiny. Kïlenyona nyu, ompö kirurutyonay, kirumï lö ghach nyoman ngokï.

Poryot nyo mi ori chi

¹⁴ Kinkïtöcha lö, Kirurut pö Tororöt kï pö mïkulögh, wölo ochan ptangengmöt nyo kikyelta kïlïkwï sekeyonto ngokï.

¹⁵ Möpköchinanïnye kïgh nyo oghöy, ompöwölo moghanye kini komökan oghöy, wölo kaghan kïyinö melö komökan.

¹⁶ Kïkany nyu ato aghan kïgh nyo kömochömanye oghöy, kuporu lö kachaman lö, karamach kirurut.

¹⁷ Kïlenyona nyu, maninye kegh nyo oghöy kïyoni, wölo ngokichoni mi orinyan.

¹⁸ Ompöwölo onkïtön lö, kïrïp kegh nko otöptönyan nyo pö ptangengmöt möminye kïgh nyo karam nyo mi orinyan. Ompöwölo kïrkegh kömi machate orinyan nyo karam, kïmomukanye oghey.

¹⁹ Nyinö kötoghan kini karam komökan oghöy, aghan nyo gha nyo kömomökanye oghe.

²⁰ Kïkany aghan kini kömomökanye oghöy, kuporu nyoni lö, melö ani kegh nyo oghöy kïyoni, wölo ngokï cho mi orinyan.

²¹ Kïlenyona, köpköchanïn nyu kïgh nyo mi kwigho ompö orinyan, nyo kötoghan kïgh nyo karam, olan olö kyaghan kiyay gha.

²² Ngörökyini mïkulöwunyan kïmïkul Kirurut pö Tororöt.

²³ Wölo kosöchan kirurut anka nyo sis kïpöghisïyi ompö orinyan nyo poryegho kirurut nyo kökachaman ante. Akaratanïn nyoni ye alïkwï sekeyonto kirurut pö ngokï cho pöghisïyi ompö portönyan.

²⁴ Heywey, wechï kowongwan! Ngo nyo sörunenanïn porï ipanïn wölo mi meghat nya?

²⁵ Oyokyinan Tororöt sörö, nyo ighöy nyoni ompö Echotyontenyo Yeso Kristo. Nka nyi nyu wölo lata otöptönyan: opöghisyechinan ante Kirurut pö Tororöt ompö mïkulöwunyan, wölo opöghisyechinan kirurut pö ngokï ompö portönyan.