RUMI 5 - PIPÏLIA

Keyityï chi man tawu Tororöt

¹ Otï ye kikuyitwecha Tororöt man ompöwölo kighönecha nyinte, kïtïngetecha nyu kalya nko Tororöt ompö Echotyontenyo Yeso Kristo.*

² Keghecha Kristo kenkïtunö lö nen pöropcho Tororöt ompöwölo kighönecha nyinte. Nka nyete nyu kïngörokyinecha kikönötencha nyo kïghömöy nyo pö ororyo Tororöt.

³ Kïngörokyinecha tïkwïl kömpölelutköcho ompöwölo kinkïtöcha lö, ipu kömpölelyö mïkukönöt,

⁴ kwipu mïkukönötö tokochu Tororöt ompö acha. Akï tokochunoni pö Tororöt nyo ipu kikönöt.

⁵ Amelö ipkecha kikönötononi langanyat, ompöwölo kikunyïghit Tororöt chomnyenyi mïkulöwecha ompö ara Mïkulögh nyo Tïlil nyo kikïkonecha nyinte.

⁶ Ompöwölo otini kitökechicha pich cho nyörkölöl, kïma Kristo ompö acha mwokïyis ompö pöroyïntanyi nyo kikïl Tororöt.

⁷ Kampalal kïma chi ompö chi pö man, wölo töptoy muköy chi kumukyini kïma ompö chi nyo karam mu.

⁸ Wölo kikuporwecha Tororöt lö chömecha nyinte nyoman, ompöwölo kima Kristo ompö acha, otini kitökechicha mwokïyis!

⁹ Kïlenyona ye nyu otï kikeyityecha man ompö megha Kristo, mösörwechanye nyinte ompö nörekyo Tororöt ato rwokyini pïchï?

¹⁰ Kikïchicha pung pö Tororöt wölo kikulinyecha nyinte ompö ara megheto Werïnyi. Otï ye kikelinyecha nko Tororöt, mösörwechanye nyinte tya ompö söpon pö Kristo?

¹¹ Akïmönyoninye onkït, kïturonchocha ompö kïgh nyo kegh ye Tororöt ompö Echotyontenyo Yeso Kristo nyo keghecha kelinyenö nko nyinte.

Adam nko Kristo

¹² Kipka ngokï ngwïny kuwerï chi akonga, akï ngoki chichoni cho kipï meghat. Kïlenyona nyu, ompöwölo kigh pich ngokï, kuchumchï meghat pich lapay.

¹³ Kimi ngokï ngwïny kïtomö kïkonï Tororöt kirurut cho kitö Musa, wölo melö kiyitöy lö kegh chi ngokï ato mömicha kirurut.

¹⁴ Wölo kipayta meghat pich kïngeta osiswo Adam ntökwit osiswo Musa. Kipayta lenyoni ompö pich cho melö kigh ngokï cho lata cho kigh Adam, nyo kipeny kirurut pö Tororöt. Adam kï ki körkeyïn pö Kristo nyo kitökungwïnöy.

¹⁵ Wölo melö karkegh laras ompöwölo memukonye kekongityö ropöwonto Tororöt nko ngoki Adam. Pö man kemwa lö, kimeghö pich cho chang ompö ngoki chi akonga. Wölo wow tya pöropcho Tororöt akï wow tïkwïl ropöwontenyi ompö pich cho chang ompö pöropcho chi akonga, Yeso Kristo.

¹⁶ Amelö karkegh kïgh nyo ipu ropöwontononi pö Tororöt nko kïgh nyo ipu ngokichoni pö chi akonga, ompöwölo kingwïn lelutyö kuwerï chi akonga akwipï ngwonïn, wölo ompö ara pöropchö kelöwön kirwokonay kelenchecha “Mötïngökwanye lelut,” ompö tawu Tororöt.

¹⁷ Ompöwölo ato kipöyï meghat pich ompö lelutyo chichoni le akonga, kïwow nyu tya söpon ompö pich cho toköy pöropcho Tororöt akeyityï man ompöwölo mi nyinte. Mukisyot choni ompö ara chichoni le akonga, Yeso Kristo.

¹⁸ Kïlenyona nyu, kïle wölini kipchï pich löwïr kirwok ngoki chi akong, yitöy Tororöt pich löwïr lö mökïtïngcha lelut akwigh kïsöpchö ompö ara chi akonga nyo le chi pö man.

¹⁹ Ompöwölo kïle wölini kikigh pich cho chang kïlïkwï mwokïyis ompö tighintöno chi akonga, kïlenyoni tïkwïl, yityini Tororöt pich cho chang man ato terchï chichoni pö man le akonga, Yeso Kristo.

²⁰ Kikïkonï kirurut atökïtasa penyata kirurutchay. Wölo otini kïtas pich tya kwigh ngokï, kïtasa ompö tya pöropcho Tororöt ompö pich!

²¹ Kïlenyona nyu, kïle wölini kipayta ngokï ompö ara meghat, kïpöytoy tïkwïl pöropcho Tororöt ompö ara man atökuntöghoghwecha pöropchononi kelïtö wölo mi söpon pö kokay ompö Yeso Kristo Echotyontenyo.