RUMI 15 - PIPÏLIA

¹ Mïchinecha cho kïchï chïchïmote ompö kighanat kengaraka pikö walaka cho nyörkölöl kumï kïrïnta kömpölelutkökwa, amökeyang kegh opïn.

² Akanya kwigh chi anka tïkwïl pöröryenyi kïngarak atökïtech nyinte ompö kighanat.

³ Ompöwölo kimayangnye kegh Kristo,* wölo le ato mwoghöy Kikirut, “Ketöngwanïn ye kimwagh anka tïkwïl nyo kikimwagheninyi.”

⁴ Ompöwölo tïkwïn löwïr cho kikikir könyisyok, kï kikikir tökunetecha atömanyïl kesïch kikönöt ompö mïkukönöt nko kikilöto kegh nyo kïsïkonecha Kikirut.

⁵ Nya kungarakekwa Tororöt nyo ighekwa amïkukönö akïkonok kikilöto kegh atamuka osïkö keröt akonga nyo orïpöy körkeyïn pö Yeso Kristo,

⁶ atamukakwa lapay, ompö kut akonga asala Tororöt, Papoto Echotyontenyo Yeso Kristo.

Lökoy cho Karamach ompö pipö punton

⁷ Kïlenyona nyu, ataka kegh akwane ompö ororyo Tororöt le wölini kitaktakwa Kristo.

⁸ Ompöwölo omwowokwa lö, kipöghisyechï Kristo pipö Yaudi atökumï nyinte kuparta lö, pö man Tororöt akupuntoy kiyomisutkachi cho kimwochï papotïnecho,

⁹ atökumï pipö punton tïkwïl kïsal Tororöt ompö kisyonötenyi. Le wölo mwoytoy Kikirut lö, “Kïlenyona nyu, osöleninyi kwenu pipö punton. Otuman sölutko kaynatengu.”

¹⁰ Akïmwoghöy kirurut ngat lö, “Oturonchenö akwa pipö punton oturonchenö nko pikachi.”

¹¹ Akïlentöy ngat, “Asala Echotyon pipö punton akwa pich lapay, asala nyinte.”

¹² Akïlö Isaya ngat, “Chumu chi asïyech nyo pö ara Yese akï nyinte nyo pöytoy asïyech pipö punton, akï chichoni nyo könöy asïyech puntonï.”

¹³ Nya kunyïghitakwa Tororöt nyo töni pich kikönöt, ngörekyö nko kalya, kïrïp kegh nko kighanatenkwa, atökïtasa kikönötenkwa ompö owesyo Mïkulögh nyo Tïlil.

Kïgh nyo kigh Paulö kukir ompö nyakanat

¹⁴ Onkïtön ante tïkwïl, tupchenyu lö, otïngetekwa mutïn cho karamach, achikwa ngöghomöch nyoman, amukekwa onete kegh.

¹⁵ Wölo kakirwakwa ngal cho te ompö palalyantanï amelö ompö nyökoryö atamuk ononwokwa ngale walaka. Kaghan lenyoni ompö pöropchö nyo kökonanïn Tororöt,

¹⁶ alïkwï mötworinto Kristo Yeso nyo opöghisyechini pipö punton. Opöghisyechinan chane le tïsin otini omtonan Lökoy cho Karamach cho pö Tororöt, atökumï pipö punton walaka, kïlïkwï tïsöw cho chömöy Tororöt, akï cho kikutïlil Mïkulögh nyo Tïlil.

¹⁷ Kïlenyona nyu, le otini kolinyan nko Kristo Yeso, omukan okwolone kegh ompö tïkwïn cho kyoghchan Tororöt.

¹⁸ Omwoghan ompö nyakanat kïgh anka tïkwïl, nyo kigh Kristo Yeso otini kipöghisyeghenanïn tökumï kïter Tororöt pipö punton. Kigh nyinte lenyoni ompö ngal nko ighisyewut

¹⁹ nko ompö owesyo kiporut nko töngönchintin nko ompö owesyo Mïkulögh nyo Tïlil. Kïlenyona ompö westoghtanyan kïngeta Yerusalem ntökwit Iluriko. Kyamtan Lökoyechoni Karamach pö Kristo.

²⁰ Machatenyan kïtenö osis kï omchï pich Lökoy cho Karamach ompö wop anka tïkwïl wölo tomönye kelïma kaynata Kristo, atömalïkwan chi nyo teköy paraku kitoröto chitö anka.

²¹ Kïle wölo mwoytoy Kikirut lö, “Sïwïyi pich cho kitomöcha kyomchï lökoyechi, akïsöwï chane cho kitomöcha kïlïm.”

Tatata Paulö kïrutochï Rumi

²² Nka nyoni kïyoni kimiranïn kïnyïl cho chang tömatwan korenkwa.

²³ Wölo kawanyan ye nyu ighisyenyu ompö onkunï, akwompöwölo kö kopïrchan nyo kogh atï wöloni,

²⁴ okönan lö otunan lenyoni pöroyïnete. Ompö rutoghtönyan nyo owetöy koro Spein, omökan owerwokwa ato kono egh ompö rutoghnoni atotenö kopöghönön akengörekyö tïkwïl nko akwa ompö osis cho te.

²⁵ Wölo omitan otï le ye owetöy opöghisyechini pipö Tororöt ompö wölnö le Yerusalem.

²⁶ Ompöwölo kakïcham kaniseni Makedonia nko cho pö Akaya kïpas ropïyen cho ngöroko kighöni walaka cho le cho mi Yerusalem.

²⁷ Kicham opïn kaniseni choni kwigh lenyoni, kïrkegh ompö man, kökïmökino chane kungarak mey. Ompöwölo ato kikïgham pipö punton kisoyönut pö pipö Yaudi cho pö mïkulögh, kï mïchini tïkwïl chane kïpöghisyechï pipö Yaudi ompö möchutkökwa cho pö por.

²⁸ Kïkany nyu otini kawanyan ighisyononi kipchini chane ropïyeni choni kipas kanisen, orutowokwa nyu otini omitan owetöy Spein.

²⁹ Onkïtön lö, opkokwa kisoyönöto Kristo nyo wow otini katwan korenkwa.

³⁰ Kïlenyona nyu tupchenyu osomokwa nyoman ompö Echotyontenyo Yeso Kristo nko ompö chomnyogh nyo konu Mïkulögh lö, anama ku lasiny ompö saghat atosoghwante Tororöt.

³¹ Osoghwante atachïwïta pich cho mi Yudea cho meghönöcha Yeso Kristo, asagha ngat atökïcham pipö Tororöt cho mi Yerusalem ighisyenyan.

³² Atolapay angwïnan wöloni omitekwa ompö ngörekyö nyo wow, ato cham Tororöt, amuny nko akwa.

³³ Nya kïtöpö Tororöt nyo konecha kalya nko akwa lapay. Amen.*