RUMI 13 - PIPÏLIA

Keterchï pipö soch

¹ Nya kïterchï chi anka tïkwïl pich cho tïng wowïn ompö soch, ompöwölo ngwïno paytagh anka tïkwïl wölo mi Tororöt. Akï nyinte Tororöt nyo töni chane paytagh.

² Kïlenyona nyu, anka tïkwïl nyo töghöy wowïn pö kintöghoghï, kïtöghöy kïgh nyo kitor Tororöt, akwanka tïkwïl nyo ighöy lenyoni kwipchini nyinte kegh kirwok.

³ Ompöwölo melö wöghöy pich cho ighöy nyo karam kintöghoghï kïpoto pich cho ighöy cho ghach. Imökenyi lö tömawagh chi nyo tïng wowïn nya? Igha nyu nyo karam atökïsalïn nyinte,

⁴ ompöwölo mötworinto Tororöt nyinte nyo pöghisïyi ompö kinyiwutyengu. Wölo ato ighanyi nyo gha, kïmïchini nyu waghanyi, ompöwölo tïng nyinte owesyö kutö chi sitöt. Mötworinto Tororöt nyinte nyo töni sitöt pich cho ighöy cho ghach.

⁵ Kïlenyona nyu, mïchini keterchï pich cho pöytoy, amelö pat ompöwölo kiwöghöy sito Tororöt, wölo kïrïp kegh nko choghïntineko mïkulisköcho.

⁶ Nka nyoni kini ighokwa akwaghtena surï, ompöwölo pöghisyechini Tororöt kintöghoghichoni otini mi kwighöy ighisyengwa kuten.

⁷ Makany kïnamak ghoksyö, ato kö nyo ghoköy surï, keghokyï, anta kö konyït, kekonyït.

Kïcham kegh pipö Tororöt

⁸ Makany kïghakak chi nyonikïny, kïpoto ghosyo chomnyogh, ompöwölo anka tïkwïl nyo chömöy pöröryenyi, kï kepuntö kirurut.

⁹ Ompöwölo kirurutchay mwoghöy lö, “Megh cheporesnan anta mepar chi anta mechorsyo anta mepïrchï tïpö pich,” nko walaka löwïr kïmi kirurutyonï le akonga nyo lentöy, “Chama pöröryengu le ato ichömenyi kegh nyinte.”

¹⁰ Melö ighchini chi nyo chömöy pöroryenyi kïgh nyo gha. Kïlenyona nyu kecham, pörör kï kerïp kirurut löwïr.

¹¹ Akïmöchonicha opïn, onkïtökwa lö kïmitö osis cho nenach. Osiswechete cho kömïchï kengetena rïwon, ompöwölo kikïlekïtit ye tya sörunötenyo kïtïl atanya kikighanacha.

¹² Kamach kuwonyö oghö, akarich kïyech. Kelastena nyu ighisyewut pö tuwïn akelach kari lïk cho pö löpoyïn.

¹³ Kemöngisyenö ompö or nyo tenate, le pich cho pestegho löpoyïn pö pöghet. Melö ompö aketagh kïsamta nko tamasa anta sïmnyontön nko cheporesnan anta syala nko sastagh.

¹⁴ Wölo nya kïlïkwï Echotyon Yeso Kristo* longa nyo ripekwa, amotö porwöyikwa pöroyïn kwigh lenyini köpïrchï kwigh.