PILIPI 3 - PIPÏLIA

¹ Nyo pö lötï nyu werköcho, ongörekyenö ompöwölo kotuyekwa nko Echotyon. Melö oghöchan amwagh ngat ngalechanye kyakiran ato le tagh, ompöwölo konokwa tösunöt ngalechoni.

² Oripenö kegh kukïdin pich cho ighöy ngal cho ghach, pich cho nömchini lat ngala mutata por.

³ Ompöwölo acha cho kïtïng mutat nyo pö man, ompöwölo kïsoghecha Tororöt ompö kingörokutyeto Mïkulöwunyi akemitecha keturonchot ompö söpontönyo nyo mi Kristo* Yeso. Melö kimontonecha kegh por.

⁴ Kïrkegh otïngetan ante kïgh nyo omuköy otwoytoy kegh tïkwïn cho lata choni, nyo ato mi chi nyo nonöy lö omuköy atwoytoy kegh tïkuchoni, kwani tya nyo kötomuköy otwoytoy kegh tïkuchoni.

⁵ Kikïmutanïn ompö asispa mut nko sömök, ochan chi pö Israel ompö yïyö, apoyan ara Penchamen chi pö Eprania nyo kingwïna pipö Eprania kïngeta otini le apite. Akwompö kïröto kirurut, kï kyochan Parisayoni.*

⁶ Kyonoghyot nyoman ompö nyakanat achop kong kanisa, kïkany ompö tïliyö nyo kïnyoru ato kïkïr kirurut kïmelö kyotïngetan lelut.

⁷ Wölo tïkwïn löwïr cho kyolentan pö tösunöt kï koyitön ye kïlïkwï tïkwïn cho puryö tösunöt ompöwölo Kristo.

⁸ Koyitön nyoman, tïkwïn löwïr kïlïkwï tïkwïn cho puryö kinyiwut ato kikongityö nko olyot nyo wow nyo pö kinkïtöto Kristo Yeso Echotyontenyan. Kalastan tïkwïn löwïr ompöwölo nyinte, koyitön tïkuchoni le samï, atömanyïl onyorwan Kristo

⁹ alinyö lasiny nko nyinte. Melö totïngetan ngat kiyityinogh pö man nyo kïnyoruno kïröto kirurut, wölo nyo ngwïno kighanat ompö Kristo, kiyityinogh pö man nyo ngwïno Tororöt nyo montoy kegh kighanat.

¹⁰ Omökan onkïtu Kristo nko owesyo kitutunötenyi agham nko nyinte kiwongunötenyi, atakarakegh nko nyinte ompö meghenyi,

¹¹ akönan ante tïkwïl lö kighanïn otutunö ngwen.

Kirïpöt tökerel kerötenyo

¹² Melö okwolan kegh lö kyatan söröm anta kyaten. Omitan onoghyot atonyorï, ompöwölo kikwighanïn Kristo Yeso alïkwï nyenyi.

¹³ Moyitanye kegh werköcho lö, kyonyorwan ropöwontononi, wölo oghan kïgh akonga, nyoni kï owutyeghenan kïgh anka tïkwïl nyo mi lötunyan, anoghyechï tïkwïn cho mi tagh.

¹⁴ Omitan ye nyu orïpöy otöngöy wölo mi kerötenyan, atonyorï ropöwontononi nyo nyoni kuröto Tororöt nyo pö söpon pö parak ompö Kristo Yeso.

¹⁵ Mïchinecha nyu löwïr cho kikekilyö ompö ara mïkulögh kesïkö kinonutyononi. Ato mi pich kwenunkwa cho tïng kinonut cho sis, kïtökïngongwokwa Tororöt choni tïkwïl.

¹⁶ Wölo keleta tagh kenama lasiny kini kikenyorï le ye.

¹⁷ Tupchenyu, arïpa wölo otöptonan, ompöwölo kikeporwokwa körkeyïn nyo karam, arïpa nyu pïchoni rïpöy körkeyïnoni kikeporucha.

¹⁸ Mi ngölyon nyo kyomwokwa kïnyïl cho chang, ayokyinan kegh omwoghöy ompö lok lö, mi pich cho chang cho poru otöptinekwa lö pung pö kimurtöwonto Kristo.

¹⁹ Sörömungwa kiwurata, ompöwölo tororötïngwa muyengwa nisonchegho chane arasingwa yonöy kinonutkökwa tïpö ngwïnyinï.

²⁰ Wölo acha kïmi möngencha yïm, akemitecha keköngöy ompö machat nyo wow Ghetintenyo kungwïna yïm, nyoni kï Echotyon Yeso Kristo,

²¹ nyo wöghököy porwoyicha chï nyörkölöl akwigh kïkarkegh nko portanyi nyo pö ororyö, ompö owesyö nyo muköy kï pöyuno tïkwïn lapay.