PILIPI 2 - PIPÏLIA

¹ Ato mi kikilöto kegh anka tïkwïl ompö Kristo* ato mi saghsaghata anka tïkwïl nyo pö chomnyogh ato mi sikom anka tïkwïl nyo pö Mïkulögh ato mi yangata anka tïkwïl nyo kingöroköy kegh nko kisyonöt,

² oghekwa ngörekyenyan kwitïta ato alïkukwa pich cho otïng kinanat akonga atïngetö chomnyogh akonga, kinonsyö akonga nko machat akonga.

³ Magh kïgh anka tïkwïl ompö ma nyo gha anta ompö menöt, wölo ompö rïngata kegh oyitö pikö walaka lö pö tösunöt kïtïlokwa.

⁴ Mayang möchutkökwo opïn wölo ayang möchutko.

⁵ Otïpinö nyu otöp nyo lata nyini kitïngeto Kristo Yeso:

⁶ Nyo, kïrkegh ki körökegh nko Tororöt, wölo melö kinan nyinte lö, kekarkegh nko Tororöt kï kïgh nyo kïchengo charut.

⁷ Wölo kïcham kuchal choni löwïr ompö machatenyi kegh akïcheng otöp pö mötworin keyï nyinte le ptangengmöt akitïng por pö ptangengmöt.

⁸ Kip kegh ngwïny akïkonyïtisyö ntökïma, megha kimurtöwon.

⁹ Kïlenyona kutotegha Tororöt nyinte kïwö parak tya, akutö kaynat nyo wow kïtïl kaynat anka tïkwïl.

¹⁰ Atökïlïkwï nyo kïtïngöy anka tïkwïl ompö kaynata Yeso, tïkwïn löwïr cho mi yïm nko ngwïny nko ngwïny ori

¹¹ atökïmwagha anka tïkwïl kutinyi lö, Yeso Kristo kï Echotyon, ompö ororyo Tororöt Papo.

Kelïkwï löpoyïn pö ngwïny

¹² Kïlenyona nyu chamankachu, otïpinö otöpnanye pö terchin kyotïngetekwa kïnomnyö, ntökïmïr tya otete le ye ochan low ompö akwa. Opöghisyenö ompö kiwaghat nko mïghöt ompöwölo sörunötengwo,

¹³ ompöwölo mi Tororöt kïpöghisïyi ompö orinkwa kïnomnyö akïkonokwa owesyö nyo omöko, apunteghö machatenyi nyo karam.

¹⁴ Agha kïgh anka tïkwïl kïpuryö ngwïrngwïronöt anta kimölöto kegh,

¹⁵ atamuka alïkuna pich cho puryö lelut cho tïlilöch, monïngo Tororöt cho tenote, cho möngöy kwenu pïn nyo mörkel akïchumpönote. Olïwunö ompö kwenungwa le kokelya yïm,

¹⁶ amitekwa nömöy lasïny ngölyonto söpon. Ato aghakwa lenyoni onyorunan kïgh nyo omuköy okwolö kegh akwa ato itï asispa Kristo, ankïtwan lö melö kyorïpön kwïle amawirnye wuw pöghisyenyan.

¹⁷ Kïrkegh keparanïn, akepighchï kisönköchan parakuto kighanatenkwa nyo le amöros nyo kïropchini Tororöt, ongörökan nyoman oturönön nko akwa löwïr.

¹⁸ Kïlenye nyoni tïkwïl ompö akwa, mïchinokwa ongörekyenö, aturonchö nko ani.

Timoteo nko Epaprodito

¹⁹ Okönan lö ato cham Echotyon oyonunan Timoteo kungwïn wöloni ato lekït atökukilanïn mïkulögh lökoyö cho pkono wölo omitekwa.

²⁰ Ompöwölo motïngetanye chitö anka nyo karkegh kinonutkachi nko chichan nyo sïngo ngalekwa lasiny.

²¹ Sïngo pat pikö walaka ngalekwa kegh nyinö kötö sïngo ngala Yeso Kristo.

²² Onkïtökwa tïkwïl lö kikuporï nyinte nyakanatenyi ompö amtaghpa Lökoy cho Karamach. Kipöghisyö nyinte nko ani ompö amtaghata Lökoy cho Karamach le weri nko kwanta.

²³ Okönan nyu lö oyokwokwa nyinte lawel, otini konkïtwan kïgh nyo itwanïn.

²⁴ Oghönan tïkwïl lö ompö Echotyon, ongwïnan wöloni omitekwa ato lekït.

²⁵ Kananan lö mïchini oyokwokwa Epaprodito, werïncha nyo kïpöghisïyecha tïkwïl, akemitecha nko nyinte poryot akï pröyöntekwa nyinte nyo kingarakanïn ompö möchutköchan.

²⁶ Kikwam emö nyinte akwa löwïr akïmi nyinte kususöy kegh nyoman ompöwölo kyalïmakwa lö kichirate nyinte.

²⁷ Kikasate nyinte nyoman, tökirich kïma. Wölo kusyonchï Tororöt nyinte amelö nyinte onkït, wölo kisyonchanïn tïkwïl atömangetan nyarïl ongetyï nyarïl anka nyo wow tya.

²⁸ Opïrchinan nyoman oyokwokwa nyinte, atongörekyenökwa tïkwïl otini kasïwekwa nyinte ngat, atökïngwangwanit nyu nyariltanyan.

²⁹ Atach nyinte ompö ngörekyö nyo wow ompö Echotyon, akonyït pich löwïr cho karkegh nko nyinte,

³⁰ ompöwölo kikachakïn nyinte söpontanyi ket akwompö pöghisyo Kristo, atökumï kïkonanïn kingarakat nyo kimomukekwanye chï le akwa.