PILIPI 1 - PIPÏLIA

¹ Kakirwan palalyantanï ante Paulö nko Timoteo cho kïchï mötwori Kristo* Yeso. Kikirchinecha pipö Tororöt löwïr cho mi Pilipi, cho kiketuyö nko Kristo Yeso nko pich cho ntöghoghchini kanisa nko cho ngörokisïyi.

² Nya kïkonokwa Tororöt Paponyo nko Echotyon Yeso Kristo pöropchö nko kalya.

Kisoghchï Paulö pipö Pilipi

³ Oyokyinan Tororötïnyu sörö kïnomnyö otini omitan ononokwa,

⁴ akwotini osoghwokwa lapay kïnomnyö, osoghan ompö ngörekyö,

⁵ ompöwölo kyangarakanïkwa nyoman ompö ara Lökoy cho Karamach kïngeta asisanye pö tagh nko ye.

⁶ Onkïtön nyoman lö puntoy Tororöt nyini kitor pöghisyononi karam ompö orinkwa otinö kamïla Kristo Yeso.

⁷ Nka nyï ononokwa lapay osis tïkwïl ompöwölo omitekwa mïkulöwunyan. Ompöwölo kïghömtonecha nko akwa pöropcho Tororöt otete le ye omitan chela nko atanye kimochanye ratate ataghet apintit Lökoy cho Karamach.

⁸ Söwintenyan Tororöt lö omwoghan man otini omwoghan lö amatanïn emö nyo wow akwa löwïr nko chomnyogh nyo ngwïno Kristo Yeso.

⁹ Osoghan kïtasa chomnyenkwa tya anyorï ngöghomnyö nko pköchin anka tïkwïl

¹⁰ atamuka agha tïkwïn cho karamch alïkwï pich cho tïlilöch cho puryö kigheghchin otinö kamïla Kristo.

¹¹ Kinyïghitöy söponwekwa akwa man cho muköy Yeso Kristo nyinte kuyinu ompö ororyö nko salata Tororöt.

Söpon kï Kristo

¹² Tupchenichu omökan onkïtunökwa lö, kengarak ngala cho kipkonchanïn Lökoy cho Karamach kulet tagh.

¹³ Kïlenyona, kikunkïtï pich tïkwïl cho ripöy kö pö soch nko pikö walaka löwïr cho mi yete lö, ochan ratate ompöwölo opöghisyechinan Kristo.

¹⁴ Akïmi tupchenicho cho chang cho tïng kighanat nyo wow ompö Echotyon akïtïng nyakanat nyo mwotïtegho ngölyonto Tororöt kïpuryö nyökoryö.

¹⁵ Omtoy pikö walaka ngala Kristo ompöwölo söschinanïn akï syölï chane, wölo omtoy walaka ompö keröt nyo karam.

¹⁶ Ighöy chane lenyoni ompö chomnyogh ompöwölo nkït chane lö, Tororöt nyo kïkonanïn ighisyonï aparta Lökoy cho Karamach.

¹⁷ Omteghoy pïchoni le söstoghï akï syölï Kristo kanyanyighos, melö ompö tïlilyö. Ighöy lenyoni akïlentöy tökïtasa nyarïltanyan otï omitan chela.

¹⁸ Mökïghnye! Ochan ngarakate ato kimï kyamta ngala Kristo ompö or anka tïkwïl, ato kö ompö keröt nyo karam anta nyo gha, otösan tagh ongörököy,

¹⁹ ompöwölo onkïtön lö kïsörwanïn ompö sowutkökwa nko kingarakata Mïkulöwu Yeso Kristo.

²⁰ Otïngetan machat nyo wow nko kikönöt lö, mosïkanye arasï ompö ighisyenyu, wölo ongölonan ompö nyakanat, osis otö Kristo konyït ompö portanyu kïmïkul ato kötosöpan anta kameghan.

²¹ Ompöwölo ompö ani, söpon kï Kristo, wölo meghat kï kinyiwut nyo wow tya.

²² Wölo ato söpön kwighanïn agh ighisyö nyo pö kinyiwut, kïmonkïtönye nyu lö eakïl söpon nya anta meghat!

²³ Köpiryechanïn ye ngala odeny, opörchinan tya owö otöpö nko Kristo, ompöwölo karam nyoni kïsir tïkwïn löwïr,

²⁴ wölo karam ompö akwa tya ato tosöpan.

²⁵ Otïngetan man, ankïtön lö totöponan nko akwa, atosïkökwa kikilöt nko ngörekyö ompö kighanat.

²⁶ Nyo ato angwïnan ngat wöloni omitekwa, osïkökwa nyu kïgh nyo opïlilo Kristo Yeso ompö ani.

²⁷ Kïgh nyo pïchigh wechara, kï otïpinökwa kïrïp kegh nko möchut pö Lökoy cho Karamach cho pö Kristo, töto orutoghwan wöloni omitekwa anta kochan low olïman kïnye lö omitekwa oghyongöy lasiny ompö mïkulögh akonga nko ompö machat akonga amitekwa okilöy kegh oporyegho kighanat nyo pö Lökoy cho Karamach.

²⁸ Mawagh nyu punkökwo, wölo onyökönitunö kïtenö osis atökïlïkwï nyoni machey nyo poru lö orïntonekwa chane, ompöwölo Tororöt nyo konokwa rïntaghat.

²⁹ Ompöwölo kakekonokwa pöropchö nyo opöghisyechini Kristo melö ompö kighanat onkït, wölo ompö kiwongunöt tïkwïl nyo owongunonekwa nyinte.

³⁰ Omukekwa ye nyu oghömwanïn poryononi kyasïwekwa oporyonan, atomitan ye oporyot lenyoni olïmekwa.