OSEA 9 - PIPÏLIA

Kömwowï Osea sitöt nyo nyoru Israel

¹ Mengarak kör we Israel amoturonchö le punton walaka ompöwölo kyalïkukwa kalomak otinö kopïstekwa Tororötïngwo kyongörekyikwa ropïyeni chepkartanan cho pö wölay kïtïgho pagh.

² Wölo melö pöghekwa paghechï nko dipayka* amelö tonyorunekwa dipay cho relach.

³ Melö dongöy chane koro ECHOTYON mïlïsyot pipö Epraim Misri akwam omisyewut cho le sïmnyon ompö Asirya.

⁴ Melö pightoy chane dipay kïpighchini ECHOTYON. Amelö tökïngörökyini nyinte ropöwekwa lïku omisyengwa ompö chane nyo pö lok, akïlïku chane löwïr cho kam sïmnyon. Lïku omisyengwa nyo pö mu kwïle, amelö mïchini kepï le amöros Kö pö Tororöt.*

⁵ Oghekwa ne ye ompö osiswo ichontin cho kikïtötwokwa? Oghekwa ne ompö asispa ichon pö ECHOTYON nya?

⁶ Kïrkegh operteghena kiwurat nyo pïnï, supokwa Misri akïtïpchikwa Mempis. Omöy wuw kaplawachitinekwa cho pö silpa akulum emenikwa kato.

⁷ Kikwitï osiswo sitöt owöy kipka osiswo kitakat. Nyo mïchini kunkïtï pipö Israel osiswechï Anyï kyaghakwa werkoyon sölwö, alekwa chepoyï chi nyo ntöghoghchini mïkulöwu Tororöt akwompö ngokikwa cho chang nko kireyat nyo wow.

⁸ Lïku werkoyonta ripinto Epraim pipö Tororötinyan wölo kiketö ngöghöp ortinechi löwïr wölo weröy. Akereya ompö nyini le koto Tororötïnyi

⁹ kyolïtokwa ngokï lödïr le wölo kilata ompö Kipea Nonöy nyu Tororöt lelutkökwa akïmuny chane ompö ngokikwa.

Sörömu ngoki pipö Israel

¹⁰ Lentöy ECHOTYON, otini kyasïwan pipö Israel nyo tagh, kilenye ato kïnyorchï sapipun surkwen otini kyasïwan papotïnekwa kilenye makany cho keyin nyo pö tagh wölo nyini kipa Paal Meor kutïlichï kegh Paal* le kïgh nyo chomöy chane.

¹¹ Ngetoy ororyo Epraim le tarit nyo kepiltö mokïminye yiyotö anta mirsyogh anta sïkisyogh.

¹² Nyo kïrkegh kanam monïng ochengan löwïr möminye ompö akong nyo ngötyini nyinte.

¹³ Heywey nyu chane otinö kopïstan opïn kolipön kono monïngo Epraim kuwonyö

¹⁴ Ighchinö chane kïgh we ECHOTYON wölo ne nyo ighchinenyi chane nya? Tönö kïngörölyö korukwa kïyontoy kitin mereriy monïng.

Kirwoko Tororöt ompö pipö Israel

¹⁵ Ompöwölo kitorö ngokikwa löwïr Kilkal wölini wölo kyotoran arey chane oyonenan chane Konyan ompö ighisyewutkökwa cho ghach melö tochöman chane kokay kïlïkwï kintöghoghikwa penyi.

¹⁶ Kikemuny pipö Epraim kilïkwï le tikit pö ket cho kiyomö amelö tökuyinöy akwa nyonikïny. Akïkïrkegh köyï monïng, owonyan monekwa chini chömo kegh.

Ngölono werkoyonta Israel

¹⁷ Wirtoy nyu Tororötinyan chane nyoman, ompöwölo melö kiterchï nyinte lïku nyu kochur ompö punton.