OSEA 8 - PIPÏLIA

Rwokyini ECHOTYON Israel ompö saghata körkeyïntin

¹ Lentöy ECHOTYON, “Akuta kontï! Achona pung kipka le mötong kupokyï Kö pö Tororöt* ompöwölo kipeny chane mumenyan akïtagh kirurutköchan.

² Kirichinanïn pipö Israel lö, ‘Kinkïtöchanyi we Tororötïnyo!’

³ Wölo kïtagh chane ngal cho karamach wölo rïpöy nyu chane pung.

⁴ “Kikïlchï kegh pöytoghï, amatepenanïn, kutökegha kintöghoghï cho melö kyonkïtön. Kwighchï kegh tororötino silpa nko koltin. Choni nyu cho ighöy chane kuwonyö lömïs.

⁵ Lilanïn kïgh körkeyïntöngu nyo pö mogh we Samaria konörekyokwa nyoman. Olelekwa nko oyï nya?

⁶ Alatekwa choni nyu pipö Israel nko körkeyïntöngu nyo kïgh puntïyonta melö Tororöt nyonikïny nyona kïtïghotïghöy körkeyïn pö Samaria nyay le mogh.

⁷ Ompöwölo kikatkat yomat akwil pïchpïch melö yinöy paghekwa Amelö rïröy paghekwa ompö par wölo kïrkegh kïrïr kwomo chane pich walaka cho le to

⁸ kikïtïp chane, ompöwölo mi kwenu punton walaka le karin nyo melö tïng kinyiwut.

⁹ Ompöwölo kapusta Asirya kïyarata kingörokut le sïkïryo wow nyo keturotö onkït. Kal pipö Epraim mïrönkachi

¹⁰ Kïrkegh kayarata mïrön kïlït punton, wölo oghömitunan chane ato lekït. Atoni ato lïmchini kegh nïkisïn nyo ketunga chane pöytoghinto Asirya.

¹¹ “Ompöwölo kigh Epraim ato kïpelo amöros cho möngörï, akïlïkwï nyu wöloni kïpelo amöros wölo igho ngokï.

¹² Kïrkegh kyorirchan chane kirurutköchan kïmelö yitöy lö kïgh.

¹³ Chömöy kutötoy amörostin, atökwam nyu panye, wölo melö tökïngörökyini ECHOTYON chane. Nonöy ye nyu nyinte ngokikwa akutö sitöt, mïlisyot akïlïkwï sekey ompö Misri.

¹⁴ “Ompöwölo kikïwityeghö pipö Israel ighintengwa, akïtekyï kegh korïn echön. Kïtek Yuda kanastin cho chang akuyokir nyoman, wölo oyokyinan ma kanastinechi, nyo pelöy kuwonyö wölona tigho kegh.”