OSEA 7 - PIPÏLIA

¹ “Otini olentan osopöy piköchan Israel kirumï ngoki Epraim ngat, akïrumï ngoki Samaria ighöy chane ngala putïntön weröy korïn akïchorsyö, söro pich tïkukwa ompö ortïn.

² Wölo melö pköchini chane lö ononan pöghisyewut löwïr cho ghach, kisat chane ngokikwa onkïtön nyoman.”

Waghakat ompö ka pöytoghin

³ Lentöy ECHOTYON, “Poypoyöy pich pöytoghin ompö ngokikwa akwigh yetïntin kïngörekyö ompö lïsutkökwa.

⁴ Cheporestin chane löwïr, kiloyö lata tör nyo mi nökögh nyo möminye chi nyo wïkini ma ntökïtenö kïrïr pan.

⁵ Kigh chane pöytoghin nko yetïntin kitömesyö, ompö asispa ichon pö pöytoghin akwigh kïlïkwï sölwöy ompö kumïn.

⁶ Kïle wölo lata ma, kuloyote chane nko olkösnön. Ighönöy kwïle nörekyengwa otï le ogho, wölo atomi tökwoghö kutölisyö le lyopöt pö ma.

⁷ Kiloyö nörekyengwa chane le ma nyo mi nökögh ompö akïtïgh kintöghoghikwa, kikepar pöytoghikwa, löwïr, amöminye ompö akong nyo sorwanïn.”

Israel nko koros

⁸ Lentöy ECHOTYON, “Kalït kegh pipö Epraim nko punton cho möngöy tïkwïl lata makatyan nyo körïr wop akong

⁹ kikïsara puntonï chane owesyengwa amelö pköchini chane. Kikïrumunö karwal mötöw amenkïtcha chane.

¹⁰ Rwokyini pipö Israel menotönengwa kegh, ompöwölo kïrkegh lapay chaye keghisyö, möwöghökisyönye kïpkonchanïn ani ECHOTYON Tororötïngwa.

¹¹ Lata Israel cheptukö nyo le sölwö nyo menkït kïgh, rïpchini Misri kïsomöy kingörokut, akï kite ngat kïsor Asirya!

¹² Wölo oghïtenan netïnyan anaman chane le törit. Otönan chane sitöt ompö ngokikwa.

¹³ “Heywey pïchï! Kipïstanïn akimostoy, kinyoröy chane ompöwölo kitaghanïn chane. Kyolentam osoru chane wölo kingölonöy putintön parakunyan.

¹⁴ Rirchinanïn chane wölo melö ompö man, wirchini kegh ngwïny akïsölölyö akïlentöy tatakan sowutkökwa cho pagh nko dipay,* wölo tökïtaghanïn chane.

¹⁵ Kirkegh kyanetan chane, atösyï owesyö, wölo tökwighwanïn ngoki chane.

¹⁶ Tökïpechini Paal* nyo melö kïgh. Lenye chane kïwang nyo kitwolö. Meghsot kintöghoghikwa ompö chok ompöwölo ngölonöy ompö menotön. Kïlenyona sösöy chane pipö Misri.”