OSEA 5 - PIPÏLIA

¹ “Atera ngalechï, we tïsï! Atera lasiny akwa pipö Israel! Alïma lasiny, we kö pö pöytoghin, ompöwölo kömïchinokwa orwokyinö ompö man. Wölo kalïkukwa ngöghöp ompö Mispa, alïkwï net nyo kakikarkar kïnam pich ompö kutïng pö Tapor.

² Kikïtas tagh kör penyï kwigh ngokikwa wölo otöninan chane sitöt.

³ Onkïtinyi, we Israel, kighanyi cheporesnan alïkunyi sïmnyon.”

Rirchini Osea pich tömösagh körkeyïntin

⁴ Karkarta ngokï pich tömömïlonchï Tororötïngwa, ompöwölo mi oringwa mïkulöwu alomi amenkïtcha chane ECHOTYON.

⁵ Rumu lötok menotöno pipö Israel nyo tïng chane, ighöy ngokikwa chane kupïtsot akwigh pipö Yuda tïkwïl kupïtyö nko chane.

⁶ Petöy chane nko okwotkökwa cho pö ngaror nko tïch kïyöröy ECHOTYON, wölo mönyorucha nyinte. Ompöwölo kikusïrar kegh nyinte nko chane.

⁷ Kilïs chane ECHOTYON, ompöwölo kisïch monïng cho pö sany cho melö tïngö kïgh ECHOTYON kïlenyona wonyot chane lömïs ompö relïn pö arawa.

Poryo Yuda nko Israel

⁸ Akuta kontin ompö Kipea, akut kontin ompö Rama. Okikö ompö Pet Apen. Owöntenö poryot, akwa pipö Penchamen.

⁹ Itu ato omungan pipö Epraim akïwïröy kore kïlïkwï surkwen. Onkïtunö nyu pipö Israel lö oghan lenyoni nyo mötïny!

¹⁰ Lentöy ECHOTYON, “Kikarkegh kintöghoghi Yuda nko pich notegho rotyotïn. Kïlenyona omïlchinan chane nyarïl nörekyenyan le puseryon.

¹¹ Mi pipö Israel kuwonguno pich cho pïröy chane akesara chane korengwa ompöwölo kicham chane kïrïp ngala pich.

¹² Kïlenyona olïkunan rirïm ompö pipö Epraim alïkwï chepserkech ompö pipö Yuda.

¹³ “Otini kisïwa pipö Israel lö kikewongwï lenyoni akïkany kïsïwa pipö Yuda moyokökwa, kïpa pipö Israel lawel kutang koro Asirya kïsom kingarokut pöytoghin Yerap, wölo melö kimï nyinte ntökusop chane anta sarar moyokökwa kïsöpchö.

¹⁴ Ompöwölo kyalïkwan le ngötïny ompö Israel alïkwï le wawa ngötïny ompö Yuda. Opokpokan chane, awechan kegh, amöminye chi nyo muköy kïsöru chane.

¹⁵ “Opökochtonan chane ntökïtenö kïpköchï chane ngokikwa akïmïlonchö nyu kïyaranïn. Kilöy kegh nyu nyoman kïyöranïn ompö otinö kewongu.”