OSEA 14 - PIPÏLIA

Soghchini Osea pipö Israel

¹ Omïlisyenö we Israel, omïlechinö ECHOTYON Tororötïngwo ompöwölo kichïntenyi ompö ngokiku.

² Oyokyinö kegh ECHOTYON, asagha nyinte lö “Lastena ngokicha löwïr aitakech ompö pöropchö atökesalacha nyi ompö mïkulisköcha.

³ Melö sörwecha Asirya, amelö tökemontocha kegh angoletin. Melö tökemwochinecha ngat körkeyïntinekwa cho kikighecha morïn lö, ‘Ochika Tororötincha.’ Ompöwölo nyoru panana kisyonchin ompö nyï.”

Keyomsyï ECHOTYON Israel söpon nyo rel

⁴ Lentöy ECHOTYON osopinyi ompö penyatengu ochömokwa kwïle, ompöwölo kikuyoda kegh nörekyenyan ompö akwa.

⁵ Olïkunan le röyön ompö Israel akïwetöy le ket pö tapïk akïtorta nyighin le keti Lepanon.

⁶ Pitöy tikitkachï ompö ngwïny pïchighöchitu chane le orolwö akïngutoy nyo karam le topïkut pö Lepanon.

⁷ Mïlisyot akïpka kïtïpï morichan. Kighöy chane kuyin le pagh akipit le ket pö sapipu akïngutö le sapipuno Lepanon.

⁸ Ayo Epraim, ne nyo kötedenenyi körkeyïntin nya? Akwani nyo oterunyi sowutköku akomöninyi. Alatan ket nyo iwuronenyi akungwïnonanïn kïgh anka tïkwïl nyo omenyi.

Ngala söröm

⁹ Ato mi chi nyo ngöghom, ikany kipköchin ngalechï. Ato mi chi chïrer inkïtï ngalechï. Kï man ortïna ECHOTYON löwïr akirïpöy pipö man, wölo pïtyegho chemwokïyis ortïna ECHOTYON.