OSEA 13 - PIPÏLIA

Kirwoko söröm nyo pö Israel

¹ Otini kingalan pipö Epraim kïpotonchö pich kyowesöchitu chane ompö Israel wölo nyini kilel, kïsagh Paal* kïma.

² Akïnget ye kwigh ngokï tya chane, akwighchï kegh körkeyïntin, körkeyïntin cho kikitanga silpa ompö tïnganata tïngan. Atolapay kïlenchï pich, “Oropchinö chane ropöw!” Wechï kachïchïn pich körkeyïntin cho lata kir!

³ Wölo lïku pïchï le pïrtï nyo pö tökwöghö Akilïkwï le röyön nyo pïröy lawel le morïr cho kïkötïtoy ompö rökor le ighöt nyo lïtöy chïmïni.

⁴ Wölo ochan ECHOTYON Tororötïngu nyo kyomïtuneninyi koro Misri Amöminye Tororöt anka nyo isoghenyi kïpoto ani, amöminye ghetin anka kïpoto ani.

⁵ Ani nyo kyakamaninyi ompö surkwen koro asis kwïle.

⁶ Wölo nyini kyomisyö kïpïghyö, kutor kïmen akïwutyeghanïn.

⁷ Kïlenyona alïkunan le ngötïny ompö chane osyepan chane or le möril.

⁸ Okomchinan chane le chepökerï nyo kakïsara warechi, okolkolan chane kiyotisyö porwöy atolapay aman nyu chane le ngötïny.

⁹ Owurtoninyi we Israel, wölo, ekï ngo nyo ngörokinyi?

¹⁰ Kunko ye pöytoghintenkwa kïsörunyi? Mi onö kintöghoghikwa kïripokwa nya?

¹¹ Kyokoninyi pöytoghin ompö nöryekyö ayodan ompö sïnyoryö.

¹² Kirote ngoki Epraim akïrorote ngokichi.

¹³ Tomchini nyinte kichir le nyo pö lusyogh ompö korka. Wölo lïku monïng nyo le sölwö melö chömöy kungwïna muyeto kama.

¹⁴ Oghetunonan chane owesyo ngwen, asörunan chane meghat. Mi onö ngwonengu nya we meghat? Akï mi onö kiwuratengu nya we ngwen? Melö totïngetan kisyonchin ompö akwa nyonikïny.

¹⁵ Wölo ngwïnöy yomo ECHOTYON nyo ngwïno surkwen nyo ighöy koriko pöghechi kïtenyö, akuwany pögho kompa pöghechi, nko kaplawachtanyi lödo.

¹⁶ Nyoru sitöt pipö Samaria, ompöwölo kitagh chane Tororöt akuwonyot chane ompö chok kipespesöy monekwa lömïs kichuko ngot mutïno korukwa cho nïkisöch.