OSEA 12 - PIPÏLIA

¹ Pögho kegh Epraim yomat akïyonotoy yomo kongasis kwimön akïtösotoy putintön nko rïmö. Omöy mis nko Asirya tökwip mwagh kutang Misri.

² Tïng ECHOTYON kïgh nyo gheghchinegho Yuda akutöni sitöt Yakopo kïrïp kegh nko ortinechi, akwighchï nyinte kïrïp kegh nko ighisyewutkachi.

³ Kinam Yakopo werïngwa kel kimi mu, kïkany kïlïkwï mïrön, akïsït kegh nko Tororöt.

⁴ Owöy kisït kegh nko malaykayan akïrïnta, kïloch kïpka lok akïsagh kesyonchï. Kiryam nko Tororöt ompö Petel, kïngölonchï Tororöt nyinte ompö atoni.

⁵ ECHOTYON, Tororöt Kimuktoghin, ECHOTYON kaynenyi.

⁶ Kïlenyona imïlonenyi ompö owesyo Tororötïnkwa. Akaman chomnyogh nko man, akön Tororötïngwo kïtenö osis.

Tökïmi kïtösöy tagh ngala kirwok

⁷ Karkegh pipö Epraim nko mïnchïrsyon nyo pöghisyegho ratilin cho lïso pich. Chömöy kïpïröy pich.

⁸ Kwolöy kegh, Epraim kïlentöy, “Nyo le ne, akyochan sïkön, kyoyörchan kegh mökosyenyu. Mi onö ghöyïn nyorchinan chi kïgh nyo le ngokï ompö sïkönöt nyo tenö nyï.”

⁹ Ochan ECHOTYON Tororötïngu nyo kyamïtuneninyi Misri, oghinyi ye nyu manga ema, le ompö osiswo ichontin.

¹⁰ Ani nyo kyongölonchini werkoy ki ani nyo kyotöni sïwïyatin cho möngörï, amwowan ngötïnyö ompö chane.

¹¹ Ato mi ngokï Kiliad kuwonyot lömïs. Kïkany kïpela amörostino eghin Kilkal, kïliku wölo kïpelo amörostin koghïn cho kirïkïsus ompö sörömu par.

¹² Kiperta Yakopo kïwö Aram kwïgh Israel karï tökïnyorï korka kiwo ngaror tökïnyorï korka

¹³ kumïtuna ECHOTYON Israel werkoyon ompö Misri akïripö chane werkoyon.

¹⁴ Wölo kitapata Epraim nyinte tökïnarek kïlenyona pïsyini ECHOTYONtenyi kïtïpï kisönkachi parakunyi atökeghchï nyinte kïrïp kegh nko ngokichi.