OPADIA 1 - PIPÏLIA

¹ Anyï ngölyon nyo kingor werkoyon Opadia, le wölo kimwochï ECHOTYON Tororöt paraku pipö Edom. Kiyoktö ECHOTYON mötworintenyi tökïwö kïmwochï pipö koros ngölyontenyi akikelïmacha lö kimwa lö, “Agha kegh lasiny! Apkana kepe keporyenö nko pipö Edom!”

Töni ECHOTYON sitöt Edom

² Lenchini ECHOTYON koro Edom, “Oghinyi lïkuna kwïle ompö koros löwïr Itïkunenyi cheko wawe ompö tawu pich löwïr.

³ Kalïsinyi menötengu, otï kesïwenyi lö kikïtekyï kanasyantengu nyo wow ghat parak, aimöngenyi kutïng nyo kogh. Inonchinenyi kegh lö, ‘Nyorwanïn ngo ntökureytanïn ngwïny nya?’ ”

⁴ Mwoghöy ECHOTYON lö, “Kïrkegh kemang renker nyo chïwis le kö pö sich, anta imang yïm nko kokel, otyoruneninyi wöloni lörwat. Oghan lenyoni kamwaghan.

⁵ “Atopka chorï oghö, melö so chengchini kegh tïkwïn cho kömököy kïpoto? Atopka pich cho pïtöy sapipun, pïtöy amöngötï tïkwïte keti? Wölo pkonöy pungkökwa kuwongokwa lömïs.

⁶ Akwa pipö Edom, cho opo ara Esau, kïchengenokwa kaplawachtinekwo ompö kat!

⁷ Kalïsakwa koroswö cho le kongotikwa, ketulekwa apeghena korengwo kaparekwa akïrïntakwa pich cho kyomöngisïyekwa tïkwïl ompö kalya. Ketönokwa ngöghöp kongotikwo choni kyomisïyekwa tïkwïl, atolapay kïmïnakwa kïlentöy, ‘Köwonö chïreryengwa nyo kitïngeti nya?’

⁸ “Onyoran pikökwa cho chïreröch ompö asisoni nyoru Edom sitenyan. Opuktenan ngöghomnyengwa kupot lö poy.

⁹ Wiröy mïghötö nyökon pö kanasyanta Teman, kïpöröy lïko Edom lömïs.

Kïgh nyo kömungö ECHOTYON Edom

¹⁰ “Akwa pipö Edom, kirotokwa akenyarekwa kokay, akwompö pörchö nko ghöyïn nyo kyoghchikwa werkökwo, pipö ara Yakopo.

¹¹ Kyoghyongekwa yona asisanya kiwir pung akïlïtï kukoti kanasyan. Kyaghachitukwa le pïchoni kipka kïcheng akïropchï kegh sïkönöto Yerusalem.

¹² Melö kitongörekyinekwa nyarïl nyo kinyorï werkökwa cho pö Yuda melö kimïchini oturönökwa asispa kiwangatengwa, anta ororöchï chane otini kimi nyarïl nyo wow.

¹³ Melö kimïchinokwa asisoni kimi chane nyarïl nyo wow, olïte kanasyanta piköchan, aroröchï chane ompö kiwongunöt nyo kimi chane, achengchï kegh sïkönötengwa.

¹⁴ Melö kimïchinokwa asisoni pö kiwongunötengwa, oghyongone atay ryomo ortïna anam pich cho kipertoy kuchïwitöy kegh. Amelö kimïchini onkoghchinökwa chane mori pungkökwa.

Rwokyini Tororöt koros

¹⁵ “Kakïrich ato orwokyinan ante ECHOTYON pipö koros löwïr. Kïkany nyi we Edom, kiwunyi lenyini kighchinyi pikö walaka.

¹⁶ Kigha piköchan kölöwo sitenyan, ompö kutïngtanyan nyo tïlil. Wölo gheghöy kölowo sitenyan nyo ngwan tya pöröriskökwa. Nya otini kagha kumuchö, kïmöminye ompö akong nyo ngötu, owongan chane lömïs.

Rïntoy pipö Israel pungkökwa

¹⁷ “Wölo nyu mi cho ngötu kutïng pö Sayon,* mönyorunye chane sito ECHOTYON ato rwokyini pipö koros. Kïkonyïtöy kutïngoni lö kutïng nyo tïlil pöyitu nyu atoni kore ngat pipö ara Yakopo le tagh.

¹⁸ Ngwonöchitu pipö ara Yakopo nko cho pö Yosep le ma! Wongöy pipö ara Esau le wölo pelöy ma mopö. Möngötunye chi pö ara Esau ompö akong Ighisot ngalechï lenyoni kamwaghan.

¹⁹ “Pkono pich koro Yuda okumpö tagh akïmïl koro Edom kïpkana walaka kutïngkot cho mi okumpö ta akïmïl Syepela, koro Pilisti. Pöyitu koroswo Epraim nko Samaria pipö Israel. Kïcheng pipö ara Penchamen koro Kiliad.

²⁰ Ngetu lïko pïnot pö Israel cho pkono koro Yuda okumpö löt. Pkonöy kïmïlöy kor kïngeta Poinike ntökwit Sarepat. Kïpka pïnot pö Yerusalem cho kikïrang kïpa Sardis akïmïl kanastin cho mi ewu tagh nyo pö koro Yuda.

²¹ Longöy kutïng pö Sayon* nyökon cho kisörï Yerusalem atökïpayta kutïng pö Esau. Pöyitu nyu paytagh ECHOTYON.”