OMTOGHIN 9 - PIPÏLIA

¹ Kyosötyan ngalechoni löwïr kinonutköchu, ankïtwan lö mi pipö man nko cho ngöghomöch nko ighisyewutkökwa mori Tororöt, ato kö chomnyogh anta ghöchin, kïmenkïtnye chi. Kwïle kïgh anka tïkwïl nyo mi tawungwa,

² ompöwölo ngwïnchini chane tangany akong löwïr pipö man nko mwokïyis, cho karamach nko cho ghach, ompö cho tïlilöch nko cho le sïmnyon, ompö chi nyo roptoy amöros nko nyo möroptonye. Kïle wölo lata chi nyo karam, kïlenye nyoni tïkwïl mwokïyon, akï kïle wölo lata nyinte nyo wolwolisïyi kïlenyoni chi nyo mötïngönye kïgh kiwalwalat.

³ Ghöyityö nyete nyo igho ompö ngwïnyinï, nyo ityini pich löwïr tangany akï nyïghitate ngat mïkulis pö pich ghöyïn akïmi mïkulöwekwa chepoynön otini tökïsöpchot chane, otini kewanta kegh kïpa chane kutang ngwen.

⁴ Wölo tïng kikönöt chi nyo kaketuyö nko pich löwïr cho söpsot, ompöwölo kaykay kukïy nyo satate kïtïl ngötïny nyo kima.

⁵ Ompöwölo nkït cho sötote lö kïmeghsot, wölo menkïtcha kïgh cho kameghö, akïmelö tökïtïng kinyiwut ngat akewutyeghö chane.

⁶ Kikuwonyö chomnyengwa nko kireyatengwa nko nyonyintönengwa, amökïtïnganye kïgh kokay tïkwïn löwïr cho ighisyegho ngwïnyinï.

⁷ Kikïchömunyi Tororöt kïgh nyo keghanyi, kïlenyona wïyö ama omisyengu aiturön ighegh dipayköku* ompö ngörekyö.

⁸ Ikany kïrelachitu sïroköku kïtenö osis amekany kïrörchï mwagh mötïngu.

⁹ Ngörökyinö söpontongu nko korka nyo ichömenyi, ompö osis löwïr cho pö söpontöngu nyo le kwïle ompö ngwïnyinï, ompöwölo karerantangu nyoni nyo pö söpontöngu nko sïngengu nyo kisïnganyi ompö ngwïnyinï.

¹⁰ Ato nyorï ewungu kïgh anka tïkwïl nyo ighöy, igh ompö owesyengu kïmïkul, ompöwölo möminye ighisyö anta kinanat anta chïreryö anta ngöghomnyo ngwen wölini iwetenyi.

¹¹ Asïwan ngat ompö ngwïnyinï lö melö pö kirïpötö pich cho pïrtït amelö pö poryot pich cho owesöch anta pöyit omisyö pich cho ngöghomöch anta pöyit sïkönöt pich cho chïreröch anta pöyit chömchin pich cho le tïngan, wölo ngwïnchini asis nko pöroyïn chane löwïr.

¹² Ompöwölo menkïtnye chi sayenyi nyo pö kisyonchin. Karkegh nko kaghagh cho kïnömo net, anta le törit cho kïnömo ngöghöp, kïlenyoni wölo nömtoy ngöghöp pich asispa ghöyïn, otini chïnchini chane lawel.

Ngöghomnyö nko sölwontön

¹³ Mito körkeyïntö anka ngat nyo kyasïwan nyo pö ngöghomnyö ompö ngwïnyinï, nyo kilata kïgh nyo wow ompö ani.

¹⁴ Kimi kanasyanta nyo mïnïng akimi pich orinyi cho ngörï, kungwïn pöytoghintö nyo wow kïporyeghö akurich kïtek nayat nyo wow atökïporyeghö.

¹⁵ Wölo kimi kanasyantanoni meywon nyo ngöghom, kisörunö nyinte kanasyantanoni ngöghomnyenyi. Wölo puryö chi nyo kinan nyinte.

¹⁶ Wölo omwoghan lö, kaykay ngöghomnyö kïtïl owesyö. Kïrkegh kesas ngöghomnyo meywon amökïterchï nyinte ngalechoni.

¹⁷ Kaykay kelïm ngala chi nyo ngöghom nyo ngölonöy mut kïtïl kelïm kiteghata pöytoghin ompö kokwo sölwöy.

¹⁸ Kaykay ngöghomnyö kïtïl kori lïk, wölo muköy lelutyö akong kunyoröy tïkwïn cho chang cho karamach.