OMTOGHIN 8 - PIPÏLIA

¹ Ngo nyo kikongityot nko chi nyo ngöghom? Akï ngo nyo nkït kïwöghököy kïgh? Ighöy ngöghomnyo chi kïlöpoyit tokochunyi akïwaghach sïngiryenyi.

Konyïtö pöytoghin

² Omwowunyi lö irip kirurut pö pöytoghin, kïkany ato iwolwolchinenyi Tororöt, mekomchï,

³ iweghö tawunyi, menaknakan ato kakïghachitu ngala, muköy nyinte kwighöy kïgh nyo kömököy.

⁴ Ompöwölo tïng owesyö ngölyonto pöytoghin, ekïngo köny nyo muköy kïlenchini, “Ighenyi ne?”

⁵ Möswongönye kïgh chi nyo rïpöy kichikötenyi akunkït nyinte nyo ngöghom ato mïchini kwigh nko wölo idoy.

⁶ Ompöwölo tïng kïgh anka tïkwïl pöroyïntanyi nko orenyi, kïrkegh ketungöy chi kömpölelutkachi lö lïl.

⁷ Ompöwölo menkïtnye lö ne nyo igho, ompöwölo ngo nyo muköy kïmwochini nyinte wölo lïku?

⁸ Möminye chi nyo tïng owesyö nyo ripo söpontanyi, anta nyo notegho asisto meghenyi. Kïle ato meperteghonye chi poryot, kïmösörunye ghöyityö pich cho kikïnagh ngokï.

Mwokïyon nko chi pö man

⁹ Kyasïwan ngalechoni löwïr anan kïgh anka tïkwïl nyo igho ompö ngwïnyinï, nyo ngetöy chi nyo tïng paytagh kutungöy chitö anka akwanyï nyinte nyo wongu.

¹⁰ Asïwan ngat mwokïyis ketïpöy akimi kïrusot pïrïmpotikwa. Nyini kyamïleghan wöloni angwïn kanasyan wölo kigho chane ngokikwa, otomwan mi pich kïsölöy chane kwïle choni tïkwïl.

¹¹ Ompöwölo melö kipuntoy lawel kirwoko kïgh nyo gha nyo kegha, kikesötyï mïkulis pö pich kwigh ghöyityö kïmïchï.

¹² Kïrkegh kegh mwokïyon ngokï cho makïrar akïsöp nyo kogh, wölo onkïtön ighisyot nyo karam ato le löt ompö pich cho mwoghöy Tororöt ompöwölo wöghöy chane nyinte,

¹³ wölo melö tenöy ngala mwokïyis, weröy osiswekwa le rurwö, ompöwölo mewöghönye Tororöt.

¹⁴ Mi lïsata anka nyo igho ompö ngwïny nyo le kwïle, nyoru pipö man kïgh nyo kömïchini kïnyorï mwokïyis, kïrïp kegh nko ighisyewutkökwa, kïnyorï mwokïyis kïgh nyo kömïchini kïnyorï pipö man kïrïp kegh nko ighisyewutkökwa. Olan kwïle choni tïkwïl.

¹⁵ Atolapay asalan ngörekyö, ompöwölo mötïngnye chi kïgh ompö ngwïnyinï kïpoto kwomisyö akïgheghsyö akïngarak. Nyoni kitö nyo muköy nyinte kwighöy otini sïngöy ompö osisweko söpontanyi cho töni Tororöt ompö ngwïnyinï.

¹⁶ Otini kyasatan kinonutkachu kunkïtï ngöghomnyö, asïwan ighisyö nyo igho ompö ngwïny lö melö rïwöy chi pöghet anta nangat,

¹⁷ asïwan nyu ighisyo Tororöt kïmïkul lö memukönye ptangengmöt kunkïtu kïgh nyo igho ompö ngwïnyinï. Kïrkegh kölö chi osïngöy kïtya tonkïtï, kïrkegh kïlentöy nyinte ochï ngöghom, kïmemukönye kunkïtu.