OMTOGHIN 7 - PIPÏLIA

¹ Kaykay otöp nyo karam, kïtïl mwaghpa olyot nyo wow akïkaykay asispa megha chi kïtïl asispa yiyenyi.

² Kaykay kïwö chi kaw nyo kïriryegho kïtïl wölo kyomo ichontin, ompöwölo sörömu pich nyoni löwïr akïkomönchini chi nyo satate mïkulögh.

³ Kaykay kewongwï kïtïl keror, ompöwölo ighöy wurönötö tokochu chi kïngarak.

⁴ Nonöy chi nyo ngöghom ngale meghat, wölo nonöy mïkulis pö sölwöy ngörekyö.

⁵ Kaykay keterchï chi nyo ngöghom chilatenyi kïtïl kïtum sölwöy tumwöy cho kwolinyi.

⁶ Kïle wölo chöghtoy kato ompö nökögh cho noghchini tör, kïlenye nyoni roröto sölwöy, kwïlenyoni tïkwïl.

⁷ Ighöy pïrötö chi nyo ngöghom kïlïkwï sölwö nyo mötïny, akuwurinyi ropata ato ichenganyi.

⁸ Kaykay sörömu kïgh kïtïl kitorötenyi akï ngwangwa nyo kömöghöy kïtïl nyo kwolöy kegh.

⁹ Irip kegh menyagh imïrmïritï, ompöwölo töpo mïrmïryö mïkulis pö sölwöy.

¹⁰ Memwagh lö, “Wechï kikaram ngwïny Köny kïtïl ye?” Ompöwölo melö ketepanyi ompö ngöghomnyö.

¹¹ Karam ngöghomnyö, lenye mïlat, pö tösunöt ompö pich cho sïwïyi asis.

¹² Ompöwölo körtewon ngöghomnyö le ato körtewon ropïyen, akï tösunöto chïreryö kï nyï, komönöy ngöghomnyö chi nyo tïng ngöghomnyö.

¹³ Nana lasiny ighisyo Tororöt, ngo nyo muköy kïpïr kïgh nyo kigh nyinte kukömpolö?

¹⁴ Turönö ato ten ngala ompö nyi, kïkany ompö asispa kömpölelyö inan, Tororöt nyo ipu tïkuchoni kwodeny, atömenkïtïtï chi anka tïkwïl kïgh nyo igho ato kikïrapas nyinte.

¹⁵ Kyasïwan kïgh anka tïkwïl ompö söpontönyan nyo le kwïle lö mi chi pö man nyo meghöy ompö mantanyi akïmi mwokïyon nyo letöy tagh kïsöpöy akwighöy ngokichi.

¹⁶ Kïlenyona melïkwï chi pö man kïtïl, amegh kegh nyo ngöghom kïtïl. Ompö ne temökenyi wure kegh?

¹⁷ Amelïkwï mwokïyon kïsir anta ilïkwï sölwö, ompö ne temaka megha kïtomö osisweku?

¹⁸ Mïchini namanyi nyinö pö tagh, amepïstö nyinö pö odeny, ompöwölo choni cho teköy chi nyo wöghöy Tororöt.

¹⁹ Töni ngöghomnyö owesyö chi nyo ngöghom kïtïl pöytoghï taman cho mi kanasyan.

²⁰ Möminye chi pö man ngwïny nyo ighöy nyo karam amegh ngokï.

²¹ Meyöpchï yit ngal löwïr cho mwoghöy pich, tömelïm mötworintengu ato chïpinyi,

²² ainkïtönyi ompö muyengu tïkwïl lö ichïpenyi pikö walaka kïnyïl cho chang.

²³ Kyokïninian ngalechoni lapay ompö ngöghomnyö, olan, “Ongöghomitunan,” wölo kimarikanye.

²⁴ Möminye chi nyo nkïtu ngal cho lowöch, cho kiröytö ori tya.

²⁵ Oyokyan kegh asyach atonkïtï ngöghomnyö nko kïgh nyo poru tïkwïn cho ighisyot, ghöyityö kï sölwontön akï chepoynön.

²⁶ Onyorwan kïgh nyo ngwan kïtïl meghat, nyoni kï korka. Nöminyi chomnyenyi nyo koninyi nyinte le ngöghöp nyo karkegh ewunechi nko sïrïmtin, chi nyo wöghöy Tororöt nyo chïwïto nyinte, wölo nömöy nyinte chi pö ngokï.

²⁷ Kïlö omtoghintö arose lö kasïwan choni otini kotuyan kïgh akonga nko anka atonkïtwan chongïntöngwa,

²⁸ nyo mi söpontönyan kïyöröy kïnomnyö, akïtomönye asïwan. Konyorwan chi akonga nyo le mïrön ompö pich elpu akonga, wölo tomönye onyorwan korka ompö kwenu pïchoni löwïr.

²⁹ Anyï kïgh nyo kanetan kegh kïpoto, lö kigh Tororöt chi kuten, wölo kïyar chane tïkwïn cho chang.