OMTOGHIN 11 - PIPÏLIA

¹ Lösyinö pagheku pögh parak, ompöwölo tösisyot ato mökïlownye.

² Tötenö kareran tönö pich mut nko odeny anta mut nko sömök, ompöwölo menkïtnye chi kïgh nyo pïnï.

³ Ato sïngirisyö poltoy, kïmïlchï pögh ngwïny, kïkany ato rulchï ket okumpö tagh anta okumpö ewu löt kïrïwöy ketoni otini körulchï.

⁴ Melö letoy pagh chi nyo topönöy yomat, amelö ilö kïgh chi nyo topönöy poltoy.

⁵ Kïle otini menkïtönyinye wölo tortoy söpon ompö muyo korka nyo nïkis, kïlenyoni tïkwïl menkïtönyinye ighisyo Tororöt nyo le ighinto tïkwïn löwïr.

⁶ Iletonyi kösïgheku ato le tökwoghö nko otini kemön tïkwïl, ompöwölo menkïtönyinye lö ekï chono cho pitöy nyo karam, chï anta chinö anta pitöy choni kwodeny nyo karam.

⁷ Anyïn löpoyïn akïmïlöy chi ato topön asis.

⁸ Ompöwölo ato töpö chi könyis cho chang, akany kïngörökyï choni löwïr, wölo akany kunan lö chongitu osiswo tuwïn. Kwïle kïgh anka nyo ngwïnöy.

Kiruröto chumwak

⁹ Ngörökyinö mïnïngïntöngu chi nyo ichï naran aikany kïngörökyï mïkulöwungu osisweko chumwaknatengu airïp ortïneko mïkulöwungu nko kïgh anka tïkwïl nyo sïwïyi konyiku. Wölo inkïtï lö ipunyi Tororöt ompö tïkuchoni löwïr.

¹⁰ Kïlenyona nyu nateghena kisusöt mötïngu ailowitö ngwonïn portöngu, ompöwölo nörotyö nko otini kapusï chi kï kwïle.