OMTOGHIN 10 - PIPÏLIA

¹ Sunöy kolyongï cho kimeghö mwagh nyo ngutoy nyo karam, kïlenyoni tïkwïl tungöy sölwontön, nyo mïnïng ngöghomnyö nko konyït.

² Rulchini mïkulöwu chi nyo ngöghom wölo mi kitenata wölo rulchini mïkulöwu sölwö okumpö ghöyïn.

³ Rörchini pköchin sölwö kïrkegh otini mi pan akïmwochini chi anka tïkwïl lö sölwö nyinte.

⁴ Ato nörekyin pöytoghintö, mekany kïmeghïn mu, ompöwölo ghïtoy ngala ato ip chi kegh ngwïny.

⁵ Mito ghöyïn nyo kyosöchan ngwïninï, lelut nyo pö kungwïno wölo mi pöytoghintö.

⁶ Kitöni pich cho le sölwöy ngöcher cho echön, ketö sïkön ngöcher cho mi yoporö.

⁷ Kyasïwan sekey kïpegho angoletin. Kïpegho pich cho konyïtote kelyön le sekey.

⁸ Pïtyini chi pïrïmpenyi nyo kapal, kïsïröy chi moroya nyo wiröy kasar.

⁹ Wiröy koghïn chi nyo tïghöy koghïn akïwiröy ketï chi nyo pösöy ket.

¹⁰ Ato mïtus oywö, nyo melö kalïtat, kïpöghisyegho chi owesyö nyo wow, wölo ngöroköy ngöghomnyö chi kulet tagh.

¹¹ Ato nya moroya kïsïr chi kïtomö kepörchï putyon, kïmökïminye machata nyo pö putyon.

¹² Ipchini chi chömchin ngala cho ngölonöy chi nyo ngöghom wölo pöröy sölwö ngaleko kutinyi.

¹³ Sölwontön ngalechi chini nyoghöy kïmwowu akï sörömuto ngalechoni kï chepoynön nyo gha.

¹⁴ Wïwiyöy sölwö ngal cho möngörï akï möminye chi nyo nkït kïgh nyo igho akï ngo nyo muköy kïmwochï kïgh nyo igho ato kiwö nyinte.

¹⁵ Oghöcho sölwö ighisyenyi ntökïpötyï nyinte or nyo wetöy kanasyan.

¹⁶ Heywey nyi kor nyo tökïmonïng pöytoghintengu, akwomöy yetïntineku ichon kïyech!

¹⁷ Ichinyi soyönote, we kor ato wero kityakan pöytoghintengu, akwomöy yetïntineku ichon otini mïchini tökïnyorï owesyö melö tökïtömesyö!

¹⁸ Rulöy pörko sosö akïropönï ato mayang nyinte.

¹⁹ Omisyö kïpö ngörekyö, kwighöy dipay* chi kïturön, amelö kïnyoru choni ato puryö ropïyen.

²⁰ Mechïp pöytoghin sison ompö kinonutköku anta ichïp sïkön ompö kongu ori, ompöwölo ipöy tarit ngaleku, anta mwatïta kïgh anka nyo piltoy.