OMTOGHIN 1 - PIPÏLIA

Kwïle söpon

¹ Pö ngalechï Omtoghin, wero Daudi, nyo kile pöytoghin ompö Yerusalem.

² Lentöy Omtoghintö, “Kwïle, kwïle. Kwïle löwïr!”

³ Nyoru chi tösunöt ne, ompö ighisyewutkachi löwïr, cho sïngo ompö ngwïny osis?

⁴ Weröy pïnwöy, kuker pïnwöyi walaka, wölo töpo ngwïnya kokay.

⁵ Pusu asis atolapay kïröytö akukelöy kutöngöy wölini pusuno.

⁶ Wïsöy yomat kïwetöy kutöngöy ewu löt, akïtankul kutang ewu tagh kïwö kïtankula kuwit akuwit ompö arenyi kïmïla ngat lenye.

⁷ Yintoy lalwatïna löwïr kutöngöy nanam amelö nyïghiti nanamnya, akïmïlonchot pögh wölini kitorö lalwatïna akuyinta ngat.

⁸ Kyoghochegho kïgh anka tïkwïl, memukönye chi ntökïmwa melö pïghyongi kong sïwïyagh amelö nyïghiti ngala yit.

⁹ Nyo kikïmi nyo tökïmi akeghöy kïgh nyo kikegh köny, akï möminye kïgh nyo rel nyo mi ngwïnyi asis.

¹⁰ Mi so kïgh nyo tökelentöy, “Arose, anyï kïgh nyo rel?” Ompöwölo kimi könyisyok kïtomö keyiyecha.

¹¹ Möminye chi nyo tökunonöy tïkwïn cho kikuwer, akï möminye chi nyonikïny nyo tökunonöy tïkwïn cho tökïpkonöy.

Chïreryo Omtoghin

¹² Kyochan pöytoghin ompö Yerusalem, nyo ochï omtoghin.

¹³ Kyamakan asyach tïkwïn löwïr cho kighisyeghö ngwïny, osöghwan kisusut cho kitö Tororöt pich kïsïnga.

¹⁴ Kyasïwan kïgh anka tïkwïl nyo mi ngwïnyi asis, olan aros kïlïkwï kwïle löwïr akïlenye ato kïyonöy yomat.

¹⁵ Melö kimuköy keghïtoy kïgh nyo kïnur, amelö kimuköy keyitöy kïgh nyo tïryal.

¹⁶ Olenchan kegh, “Kyonyorwan ngöghomnyö nyo wow kïtïl pöytoghin anka tïkwïl nyo kintöghoghwanïn ompö Yerusalem, konkïtwan ye nyu nyoman lö ne ngöghomnyö nko kinkïtöt.”

¹⁷ Amachan asyach ngöghomnyö, ankïtï chepoynön nko sölwontön, osïkwan lö lenye nyoni tïkwïl ato kïyonöy yomat.

¹⁸ Ompöwölo ato wowit ngöghomnyö, kïwowitu tïkwïl kisusötö, kïkany ato tas chi chïreryö, kïtösöy nyarïl.