NGÖTÏNYÖ 7 - PIPÏLIA

¹ Werïnyu, ikaman ngalechan airorchï kegh kirurutköchan.

² Irip kirurutköchan tesöpö airip kinetutköchan le kontangu.

³ Rötinö moriku aikirchï mïkulöwungu.

⁴ Lenchinö ngöghomnyö, “Ichinyi cheptöncha,” aikurö pköchin, “We kongoy,”

⁵ tökïripenin korka nyo le chepkartayan, atechïwïtena korka nyo wölin.

Korka nyo le chepores

⁶ Kyorumteghan tïrisya konyan, atopöntan kïlït konyïn möröwo tirisya

⁷ Arosan sölwöy, asïwan ompö kwenu naran, karöchïnin akonga nyo kimötïnye pköchin,

⁸ kiweröy apuke nyo kirelchini kuka kö pö kokonay, kimi kïrïpöy or nyo töngöy kö pö kokonay,

⁹ otini köröytö asis akïrarisan, ompö satïna oghö nko tuwïn.

¹⁰ Kungwïn korka lenyini kïtarok nyinte, kiloköy sïro le chepkartayan kïtïng pïrchin.

¹¹ Ki syölin akï tighin ki yonsötoy kïgh amelö töpo ngwïny,

¹² mi osis adoketis, kite kesochï ortïn, akusyepisyö ompö wop anka tïkwïl.

¹³ Kisïkwïr nyinte karachïnintonay akïchïchïn akuros lasiny, kïpuryö lalïyanat akïlenchï,

¹⁴ “Karoptan amörostin akopuntan ye kiwalwalatenyan,

¹⁵ nka nyï ye kangwïnan atarokinyi kayarinyi nyoman, konyorunyi ye nyu!

¹⁶ Koghïtochan pöröyunyan sïro cho pö katani cho kikïsïl cho pkono Misri.

¹⁷ Kanyïran pöröyunyu epe nko kapïrïmenion kïngutö lö pïlpïlpïl.

¹⁸ Nyonö nyu kepe kengörekyenö kïyech nya keturonchenö ompö chomnyenyo.

¹⁹ Ompöwölo körutö pontenyan köwö rutogh nyo low:

²⁰ kepö mïlot ropïyen cho chang akïnyöpöno nyinte ato mölownye.”

²¹ Kïkïnkïno weray ngal cho chang kukaper nyinte ompö ngalechi cho töpïlïl.

²² Kïnomnyotö nko nyinte lenyini le egh nyo kïkötöy kepetöy keyengöy anta le korinya nyo komchini ngöghöp,

²³ menkïtnye lö mi söpontanyi tapan ntökïtenö kïlït sarti pöghögh kïkarkegh nko tarit nyo kölit ngöghöp lödïr.

²⁴ Kïlenyona ye nyu, werchï ater ngalechan, aköpchï yit ngal cho ongölonan.

²⁵ Mekany kïwaghaka mïkulöwungu akïrïp ortïnechi, amepot ntepïtyï ortïnechi,

²⁶ ompöwölo kikïtïp nyinte mïrön cho chang lömïs, owöy kikuwany nyökon cho möngörï.

²⁷ Wetöy areto konyi kutöngöy ngwen röytoy kutöngöy kori meghat.