NGÖTÏNYÖ 6 - PIPÏLIA

¹ Werïnyu, ato ighyongchinyi pöröryengu ompö ka kirwok, aiyomisyinyi chi kïgh,

² akwoto naminyi ngaleko kutingu, akïratinyi ngaleko kutingu,

³ igh nyu lö werïnyu, tesörunö kegh ompöwölo ketönönyi kegh mori chi, iwö nyu lawel ipkegh ngwïny, isagh nyinte kutyakïn.

⁴ Mekany kïnamïn rïwöntö

⁵ Söruno kegh le cheptirkich nyo söruno kegh sokosin, anta le tarit nyo kechïwita kegh ngöghöp.

⁶ Wïye köny sosonï, rosa togh ompö tïl ainet kegh wölo pöghisyeghtoy tengöghomitunö.

⁷ Kïrkegh mötïng kintöghoghin anta kirwokin anta pöytoghin,

⁸ wölo rorchini kegh omisyewut osiswo kömöy akïghömïtöy omisyewut osiswo kasa.

⁹ Irïwenyi nko oyï nya sosonï? Ingetonyi oyï rïwöntengu nya?

¹⁰ Lentöy, “Opïswante orï kite, anuk nyo tangogh, aghitö morïn amuny kite.”

¹¹ Ngwïnchininyi nyu meywontön le mosin, akungwïn kikar le chi nyo le rïmin.

¹² Westoy chi nyo le kwïle akï mwokïyon, akïngölonotoy ngala sölwontön,

¹³ Ngölono konyïn nko kelyon, akï ngölonöy morïn tïkwïl.

¹⁴ Mi kipotötö mïkulöwunyi akïtötöy ghöyityö kïnomnyö. Kötkötöy kösïgho pesyogh.

¹⁵ Kïlenyona miröy nyu nyinte nyarïl, pulchini lawel nyarïl akupurpur kupot.

¹⁶ Mi tïkwïn cho le mut nko akonga cho töghöy ECHOTYON, owöy, mut nko odeny cho ghöchini nyinte:

¹⁷ Kwolöto kegh nko ngalyap nyo mwoghöy putintön, nko ewun cho mïltoy kisön cho mötïnye lelut,

¹⁸ nko mïkulögh nyo nonöy kinonut cho ghach, nko kelyön cho pïrtït kurïpchï ghöyityö,

¹⁹ nko söwintön nyo pö putintön, nko chi nyo wulyot kongot kïporyö.

Rirunata cheporesnan

²⁰ Werïnyu irip kirurutko kon, amepïstö kinetutko komöt.

²¹ Irötyï mïkulöwungu kïtenö osis ailokyï katïngu le korin.

²² Ntöghoghunyi ato iwestonyi akïripinyi ato irïwöy. Kïkany ngetanyi, kïngölonunyi.

²³ Ompöwölo kitömöwon kirurutyononi, akï löpoyïn kinetutyononi, kara kong nyo pö pïröt kï ara söpon,

²⁴ tökïripïn chïwïtena korka nyo gha akïripenin ngalyapu korka nyo le wölin.

²⁵ Mekany kïmïl mïkulöwungu pïchighïntanyi anta ikany kïwalenin konyichi.

²⁶ Muköy chi kwala chepkartayan makatyan, wölo ato wö koko chi, kepöröy nyinte.

²⁷ Muköy chi lö ne kutöni ma takatunyi amönöghö sïrokachi?

²⁸ Anta muköy chi lö ne kïtïköy ngeset, amönöghö kelyon?

²⁹ Lenye nyoni chi nyo wetöy koko chi, möchïwïtonye sitöt chi nyo swongöy koko chi.

³⁰ Sösöy pich chorin ato chorsyö lö topïghyö.

³¹ Kïkany ato kïnam, kïghoku kïnyïl mut nko odeny, tötöy tïkuko konyi lö kaw.

³² Chi nyo wetöy koko chi kï sölwö. Akï chi nyo ighöy lenyoni kï kapar kegh nyinte onkït.

³³ Nyoru nyinte moyoy nko arasï amelö tökïwïngo arasinyi.

³⁴ Ompöwölo ighöy sastagh chi kulila, amelö pïstoy metökisyö.

³⁵ Amöchömönye kïgh nyo kitötoy töketyaka, amötïng keropa tïkwïn cho chang.