NGÖTÏNYÖ 5 - PIPÏLIA

¹ Werïnyu, tera lasiny ngöghomnyenyan, aiköpchï yitïngu pköchin.

² Atemuka ripö pköchin akïkaman kutingu chïreryö.

³ Anyïn kut cheporesyan le kumat akïtöpïlïle ngalechi kïtïl mwagh.

⁴ Wölo ngwonitu söröm le musarer akïngatip le chok nyo ngötipöch woptine kwodeny.

⁵ Ryöghchini kelyechi meghat, petöy kelyechi kirïpöy or nyo wetöy ngwen.

⁶ Möyongönye ara söpon, turotoy kïsamta amenkïtunye.

⁷ Kïlenyona werkachu, oterwante ye amopïstö ngala kutinyan.

⁸ Imala kegh kokononi amerik kuketo konyi,

⁹ tömetöp ntetötö konyïtöngu, akïsarenin pkatis könyisweku.

¹⁰ Tömötiyönö pich cho tuwöch sïkönötengu akïsïkönonö chi anka tïkuku cho kisïnga.

¹¹ Ato mi löt ilöngönyenyi otini kakiwany panyeku nko portö,

¹² ilenyi, “Wechï kyataghan kerurön, akisas mïkulöwunyan chilat!

¹³ Melö kyoterchan konetichan ngalekwa, amelö kyoköpchan yit kirurichan.

¹⁴ Kikyarikan kipotöt ompö kwenu tuyo kighönï.”

¹⁵ Ghegha pögheko kölöwengu, pögh cho yinuno konto pögheku kegh.

¹⁶ Pö ne kïpa pögheko koriko pögheku kïghomï tonina, akuyintoy pögheku ompö ortïna kanasyan.

¹⁷ Nya kïlïkwï cheku opïn ameghamta nko pich walaka.

¹⁸ Nya kusoyönö koto pögheku aingörökyï korketo chumwaknatengu,

¹⁹ akïpïchighit le korinya akïlenye chemïl. Nya kïmïlïn kitichi osis akwighïn chomnyenyi wonyechinö nyinte osis löwïr.

²⁰ Ompö ne nya werïnyu, tewonyechinö chepkartayan, pö ne tesïkwïrenö ewuneku koko chi?

²¹ Ompöwölo sïwïyi ECHOTYON ortïna chi, akunkït nyinte ortïna chi anka tïkwïl.

²² Nömöy mwokïyon ngokichi kegh, akïrat nyinte sïngata ngokichi.

²³ Meghöy nyinte ompöwölo melö tïng ripöto kegh, akupotöy ompö sölwontönenyi nyo wow.