NGÖTÏNYÖ 4 - PIPÏLIA

¹ Werkachu, atera kïgh nyo netokwa paponkwa, alïm tamuka onkïtunö pköchin.

² Ompöwölo okonokwa kiyomisut cho karamach amopïstö kirntutkochan.

³ Kyochan tïkwïl werto paponyu otini kyochan mïnïng, kyochan talase, nyo kyochï chamaneto yonyan.

⁴ Kinetanïn nyinte tïkwïl lö, “Nya kïtïpï ngalechan mïkulöwungu aikaman kirurutköchan atesöpö.

⁵ Yara ngöghomnyö aiyörchï pköchin. Mewutyeghö anta ipïstö ngalechan cho omwowunyi.

⁶ Mepïstö ngöghomnyö, tökïripïn, icham nyinte tökukamanïn.

⁷ Pö komönut ngöghomnyö, kïlenyona yara ngöghomnyö. Wölo, ato inyorï kïgh anka nko anka, iyörchï kegh pköchin.

⁸ Pïlila nyinte nyoman atö kïsyolïn, konyïtïnyi ato isïkwïrönyi nyinte.

⁹ Ywölchini ngöghomnyö mötïngu sonkolyo pöropchö akïkonïn tenta nyo mirmiröy.”

¹⁰ Tera werïnyu, aicham ngalechï omwoghan atö kïchangit könyisweku.

¹¹ Kyanetinyi ara ngöghomnyö, kyoporunyi ortïn cho tenote.

¹² Ato iwestonyi, kïmöminye kïgh nyo rötöy, anta ato irïpönyi kïmöminye kïgh nyo kwötinyi.

¹³ Inam kinetut lasiny, mepïstö. Ikaman lasiny, ompöwölo söpontöngu nyinte.

¹⁴ Merïp ara mwokïyis, amewesteghö ara pich cho ghach.

¹⁵ Irop kamas, metyak aranoni. Waghakeghena aranoni aiwechï kegh.

¹⁶ Ompöwölo mörusocha, ato tomöcha kwïgh kïgh nyo gha, amelö ngwïnchini rïwonto, ato tomöcha kïmïghit chi.

¹⁷ Ompöwölo omöy chane tïpö mïrwos akïgha dipay* cho kachenga pich ompö charut.

¹⁸ Wölo lata ara pipö man löpoyïn pö yekon nyo lïwu kulïwï kwimön.

¹⁹ Karkegh ortïna mwokïyis nko tuwïn pö arawa menkïtcha kïgh nyo kwötöy chane.

²⁰ Werïnyu, iter ngalechan lasiny, iköpchï yit ngalechan.

²¹ Mepïstö kïchïwïtenin konyïn, Ikomönchï mïkulöwungu.

²² Ompöwölo söpon ompö pich cho nyoru akï sakïtyan ompö porwöyikwa kïmïkul.

²³ Irip mïkulöwungu nyoman kïtïl kïgh anka tïkwïl ompöwölo kosuno orinyi pögho söpon.

²⁴ Ilowitö kegh ngala ghöyityö ailowitö kegh putintön.

²⁵ Nya kura konyiku tagh onkït aitopön tagh.

²⁶ Iros lasiny weröy kelyeku, atökïchïchïm ortïneku löwïr.

²⁷ Memasta itang ewu tagh anta nyo pö löt, imala kegh ghöyityö.